Jharkhand leh Uttarakhand state din champha Raj Bhavan-ah lawm

Ministry of Home Affairs-in state hrang hrangte pian/din ní (formation day) inhmanpuina tur a duan, Ek Bharat Sheshta Bharat hmalaknain nimin khan Governor Dr Hari Babu Kambhampati hoin Raj Bhavan-ah Jharkhand leh Uttarakhand state din ní lawm a ni a; Larsapin state pahnih mipui chibai bûkin, lawmpuina a hlan.

November 9, 2000 khan Uttar Pradesh Reorganization Act, 2000 hmangin Uttar Pradesh state aṭangin Uttaranchal tih state a piang a, January 1, 2007 khan Uttarakhand tia thlâk a ni. Jharkhand chu November 15, 2000 khan Bihar state chhim lam chanve vel sah thlak aṭanga din a ni a; state din ní hi Jharkhand tribal hruaitu lâr leh zalenna sualtu Birsa Munda pian champha a ni bawk.

Dr Hari Babu Kambhampati chuan, Birsa Munda pian champha chu India sorkarin Janjatiya Gaurav Divas atan kum tin hman tura a puan thu a sawi a; Birsa Munda thlalak hmaah zahna lantir nan pangpar a dah.

Uttarakhand leh Jharkhand governor-te thuchah ngaihthlak a ni a; state pahnihte hlimthla (video clip) thlirho a ni. ICFAI vice chancellor Prof. Bijay Singh leh state pahnih aiawhte'n thu an sawi bawk.