YMA CCC an ṭhukhawm

Young Mizo Association (YMA) rorelna sang ber dawttu, Central Coordinnation Committee (CCC) ṭhutkhawm vawi 98-na nimin khan Vaivakawn YMA Hall-ah neih a ni a, Central YMA president Lalhmachhuana'n a kaihruai.

CCC ṭhutkhawmah hian CCC hnuhnung ber, September 13, 2023 leh tun ṭum CCC inkara CYMA chêt velna leh hmalakna te, rorel bawhzui dan te, Biatea YMA Inkhawmpui Lian neih takte chungchang CYMA general secretary Malsawmliana'n a sawifiah.

October 24-26, 2023 chhunga Biatea YMA Inkhawmpui Lian thlir lêtna hun hman a ni a, rorel bawhzui zel chu Central YMA kutah an dah.

YMA CCC-ah CYMA hruaitute bakah, sub-headquarters aiawh mi paruk zel, group aiawh mi pahnih zel leh Aizawl khawpuia branch aiawh mi pakhat zel an tel thei a; nimina ṭhutkhawmah hian mi 227 an tel a ni.

CYMA president Lalhmachhuana chuan, thawhhona ṭha neih a pawimawh thu sawiin, "CYMA hi lian viau mah se, a hnuaia branch tel lo chuan engtihna mah a ni lo. Chutiang thoin, group pawh an hnuaia mite tel lo chuan a nih tur ang a ni thei lo," a ti.

YMA hmalakna hrang hrangte chu mi pakhat chauh tan tih theih a ni lo tih sawiin Lalhmachhuana chuan, "YMA hmalakna chak zawka a kal theihna atan kan zavaia thawhho a ṭul," a ti a; YMA member-te chu lungrual taka thawhhopuiah a sáwm a ni.