Thingtlangah aiin khawpuiah hna thawh nei lo an tam zawk

Mizoramah thingtlanga cheng aiin khawpuia cheng zingah hna thawh tur nei lo an tam zawk niin Reserve Bank of India (RBI)-in tun hnaia a tihchhuah, 'Handbook of Statistics on Indian States, 2022-23' chuan a tarlang.

Handbook of Statistics on Indian States-a tarlan danin, Mizorama thingtlanga cheng zingah mi 1,000 zela mi 12 chu hnathawh nei lo an ni a, khawpuia cheng zingah chuan mi 1,000 zelah mi 35 chu hnathawh nei lo an ni thung.

India ram pum chawhrualah chuan, hnathawh nei lo hi khawpuia cheng mi 1,000 zelah mi 54 a ni a, thingtlangah chuan mi 1,000 zelah 24 a ni.

India rama state leh union territory zingah thingtlanga cheng hnathawh nei lo tamna ber chu Goa a ni a, mi 1,000 zela mi 113 chu hnathawh nei lo an ni. Hnathawh nei lo tlemna ber Madhya Pradesh-ah mi 1,000 zelah mi pariatin hnathawh an nei lo.

Khawpuia cheng zinga hnathawh nei lo tamna ber state chu Himachal Pradesh niin, mi 1,000 zelah mi 151 an ni a, hnathawh nei lo tlemna ber Dadra & Nagar Haveli-ah chuan mi 1,000 zelah mi 14 chauh hnathawh nei lo an ni.