Scho' pek phûtin MZP an pungkhawm leh Vawiinah MSB pisa kai tur dan an tum

Mizo Zirlai Pawl (MZP) huaihawtin nimin khan scholarship second instalment pek chhuah phûtin Mizoram Scholarship Board (MSB) pisa kawtah zirlaite an pungkhawm leh a; zirlaite hnenah scholarship pek a la nih loh avangin vawiinah MSB pisa kai turte an dang dawn.

MZP president H Lalthianghlima chuan, MSB-in an tih turte an tih ṭhat tâwk loh avangin tun dinmun an thleng tih sawiin, "Screening Committee vawi li an ṭhut hnuah a vawi linaah chauh scholarship chungchang ngaihtuah a ni a, hei hi scholarship hotute inthlahdah vangah kan ngai. Mizoram sorkarin September 25, 2023 khan scholarship second instalment pawisa a dawng tawh a, rei tak bawhzui lohin a awm a, MSB Secretary leh Under Secretary-te hian an tih tur an ti tâwk lo," a ti.

MSB-in zirlaite an ngaihthah nia sawiin MZP President chuan, "Scholarship sum hi September 25 khan Mizoram sum báwmah a lut a, November 3, 2023 thleng hun kan pe a, November 3 hma zawng khan scholarship file hi a che lo a, a awm tawp mai a ni," a ti. Nuam tàwl tura pungkhawm an ni lo a, zirlaite dikna chanvo rahbeha awm mek, zirlaite pawisa dawn tur an pek duh loh sual chhuak tura pungkhawm an nih thu leh, kum dangah a thleng leh a nih chuan MSB luhchhuah an hreh loh tur thu a sawi bawk.

MZP hruaitute chuan nimin chawhnu khan chief secretary Dr Renu Sharma a pisaah an kâwm a, zirlaite harsatna leh scholarship pek chhuah vat a ṭul thu an sawipui a ni.

MZP tarlan danin, zirlaite scholarship second instalment tur cheng nuai 1,787.48 chu Mizoram sorkar kutah September 25, 2023 khan a lut tawh. Scholarship second instalment la dawng lo zirlai 19,495 an awm a, chungte chu Mizoram chhunga zirna-in 36-a zirlai 5,023, pawl 11 leh 12 zirlai 11,462 leh Mizoram páwna zirlai mi 3,010 an ni.