Heroin kawl vangin pafa kum 10 tang tura hrem a ni
Champhai District special judge (NDPS Act) Liansangzuala chuan November 14, Thawhlehni khan Lalbeiseia (78) leh a fapa Lalnuntluanga (40), Champhai Vengsangte chu heroin an kawl avangin kum 10 chhung jail-a táng tur leh Rs 1,00,000 ve ve chawi turin a hrem.
July 13, 2022 tlai khan police-te'n Lalbeiseia leh Lalnuntluanga te chuanna lirthei an endik a, heroin hawng 22 an man a ni. Lalbeiseia te pafa chu police-in an man nghal a, Champhai District Jail-a dah luh an nih hnuah bail-a chhuahtir ve ve an ni. Hun eng emaw chen bail-a an chhuah hnuah Lalnuntluanga chu ruihhlo kaihhnawihah tho man leh a ni bawk.
Lalbeiseia te pafa ukil chuan, natna benvawn nei an nih avang leh Lalbeiseia chu kum upa tawh a nih avangin a nêp thei ang bera hrem turin court a ngen a; sorkar ukil erawh chuan Lalnuntluanga chu man a nih tawh hnuah pawh dan a bawhchhiat leh avangin dan ang taka hrem turin court a ngen thung.
Special Judge chuan Lalbeiseia leh Lalnuntluanga te pafa thubuaiah hian November 14, 2023 khan thutlukna a siam a, kum 10 chhung jail-a táng tur leh Rs 1,00,000 ve ve chawi turin a hrem a; pawisa an chawi loh chuan thla ruk tàn belh turin a ti bawk.