LADC chief executive member atan Manghmunga Chinzah lakluh a ni

Lai Autonomous District Council (LADC) sorkar 11-naa protem chairman, MDC tharte leh chief executive member (CEM)-te chu nimin khan Lawngtlaia LADC Secretariat tualah rinawmna thu tiamtira lâk luh an ni. 

Protem chairman atan hian Lawng­tlai DC Dr Andrew H Vanlaldika chuan Sekulh bial aṭanga thlan tlin Lallawmsanga Apetow chu tualah rinawmna thu tiamtirin a la lut a ni. Protem Chairman chuan 11th LADC-a MDC tharte chu rinawmna thu tiamtirin la lut zui a; chumi hnuah Bawrhsap chuan Lawngtlai Council Veng bial aṭanga thlan tlin Manghmunga Chinzah chu CEM atan rinawmna thu tiamtirin a la lut ve leh bawk.

MDC-te leh protem chairman lak luhna inkhawm hi LADC secretary Lianchungnunga'n a kaihruai a; Lairam Isua Krista Baptist Kohhran (LIKBK) Assembly Choir-in 'Halleluiah Chorus' an rem a, LIKBK AGS Rev. Dr Lalpekhlua Chinzah-in hunserh a hmang. CEM lak luhna chu LADC executive secretary H Lalramenga'n a kaihruai thung.

Inkhawmah hian CEM Manghmunga Chinzah bakah, Lawngtlai East bialtu MLA H Biakzaua ten thu an sawi a ni.