ECI-in vote chhiar ní sawn a tum lo; Pathiannia vote chhiar turin inbuatsaih

Election Commission of India (ECI) chuan Mizoram Legis­lative Assembly inthlanpui November 7, 2023-a neiha vote tlate chhiar hun tura a ruat tawh chu sawn tura ngenna dawng mah se, an sawn dawn lo tih an tichiang tawh. December 3, 2023-a vote chhiar turin Mizoram Election depart-ment chu an inbuatsaih mek.

Vanglaini thu dawn danin, Mizoram chief electoral officer (CEO) Mahdup Vyas chuan tun hnai khan Delhi-ah ECI hotute a kâwm a, Mizoram inthlan­puia vote chhiar hun tura ruat December 3, 2023 (Pathianni) chu tihdanglam a nih dawn loh thu an lo hrilh a ni.

Mizorama kohhran, tlawm­ngai pawl leh political party hrang hrangte chuan vote chhiar hun tura ruat December 3 chu Pathianni a nih avangin sawn turin ṭum eng emaw zat ECI an ngen tawh a, awmzia a nei ta lo a ni.

Tarlan tawh angin, vote chhiar ni sawn tura ngenna an thlen chungchangah hian tlawmngai pawlte chuan Mizoram CEO-in ngaichâng tura a ngen angin an nghâk rih a, thil awm dan azirin hmalak zui an tum.

Vanglaini palai zawhna chhangin NGO Coordination Committee secretary leh Central YMA general secretary Dr Malsawmliana chuan, vote chhiar hun sawn tura ngenna chu an ngaihven reng tih a sawi a, "CEO-in ngaichâng turin min ngen a, tunah chuan kan la ngaichâng rih a ni ber," a ti.

Dr Malsawmliana chuan, Mizoram CEO Madhup Vyas chu Delhi lamah a kal tih sawiin, "Tun kar tàwp lamah chuan a rawn haw chhoh kan ring a, a thu rawn hawn azirin hmalak zel dan tur kan la rél ang," a ti a; CEO-in ngaichâng tura a tihnaah an nghah chen turah thu chiang an la neih loh thu leh, a ṭul a nih chuan Delhi-ah ECI hotute pawh an la dàwr a rinawm thu a sawi a ni.

Vote chhiar ni sawn a ni dawn lo tih a chian tâk avang hian NGO Coordination Committee chu an hmalak zel dan tur ngaihtuahin an ṭhukhawm leh ang.