National Press Day hman a ni

Nimin November 16 kha National Press Day a ni a, Aizawl leh district ṭhenkhatah hman a ni. Kumina Press Day thupui chu 'Media in an era of artificial intelligence' tih a ni.

National Press Day hi Aizawlah chuan IPR directorate auditorium-ah hman a ni a, thuthar thehdarhtute leh IPR department officer-te an tel. Inkhawm hi IPR director C Lalnunkima'n a kaihruai a, IPR additional secretary V Ruatsanga leh MJA president C Lalrambuatsaiha te'n thu an sawi.

V Ruatsanga chuan, democracy ramah media-te chu fourth estate/pillar tih an nih thu sawiin, "Fourth estate tih an nih ang ngeiin kumin inthlan neih zawh tâkah pawh khan mipuite hriat tur zirtirna leh puan chhuah kawngah an thawh hlâwk hle a ni," a ti.

MIRSAC scientist Esther Lalremruati'n National Press Day thupui 'Media in an era of artificial intelligence' tih a sawifiah a, sawihona leh zawhna leh chhanna hun hman a ni bawk.

National Press Day hi Champhaiah chuan IPR conference hall-ah hman a ni a, Champhai IPRO C Lalremruati hoin IPR department thawktute leh Champhai district MJA member-te an tel. Vanlalruata Hnamte-in Press Day thupui a sawi a ni.

Kolasib Press Club-ah pawh Kolasib District MJA member-te'n National Press Day an hmang a; Kolasib IPRO C Lalhruaitluanga'n a hmanpui. IPRO chuan, "Tunlai khawvelah kháwlin mihringte min thunun tawh zawk a, he huna media-te kal zel dan tur leh hmasawn zel dan tur kan ngaihtuah a ngai a ni," a ti.

National Press Day pual hian Serchhip District MJA-te pawhin Serchhip Press Club-ah infuihtharna hun an hmang.

National Press Day hi kum 1966-a Press Council of India (PCI) din champha November 16-ah hman ṭhin a ni a, a hmanna pui ber New Delhi-ah chuan PCI buatsaihin Union Information and Broadcasting Minister hoa hman ṭhin a ni.