Sa emaw tiin inkâp hlum

November 15, Nilaini zan dar 11 vel khan Remruatliana (31), Hnahthial Electric Veng chuan an ramvahnaah R Vanlalkhuma (35), Hnahthial Electric Veng chu sa emaw tiin a kâp a, a kah aṭanga rei vak loah a thi.

Hnahthial aṭanga Vanglaini thu dawn danin, Remruatliana leh R Vanlalkhuma te hi a hran ve vein ramah an kal a; Remruatliana hian R Vanlal­khuma chu sa emaw tiin ulhbun silaiin a hrawkah a kâp a ni. Vanlalkhuma áwm leh dul velah silai mu a lut nual niin an inkahna hmuna kal medical team-te chuan an sawi.

R Vanlalkhuma hian a nupui Hming­chungnungi leh a fate pahnih a kalsan a, a ruang endik a nih hnuah nimin khan vui a ni.

Thil thleng chungchangah hian Hnahthial police-te chuan buaipui ṭul ang ang an buaipui nghal a, Remruatliana lakah hian thubuai an ziak lut a ni.