KHAWTHLIR

DC-in roll tlangzarh

Aizawl bawrhsap Nazuk Kumar chuan nimin khan DC conference hall-ah Dawrpui Vengthar Local Council general seat ruak pakhat hnawhkhahna by-election-a hman tur draft electoral roll a tlangzarh. Draft electoral roll-a a lan danin, Dawrpui Vengthar LC-ah hian voter 3,027 an awm a, mipa 1,365 leh hmeichhia 1,662 an ni. LC by-election neih hun tur chu State Election Commission-in a la ruat ang.

Humhalh turin ngen

Association for Environmental Preservation (ASEP)chuan thuchhuah siamin, Aizawl khawpui chhung Ngaizel khâmah tunlai hian Mizoram state animal sazâ hmuh tur a awm tih an tarlang a, "Ngawrh taka humhalhna kalpui mektu Kulikawn khawtlang chungah lawmthu kan sawi tak meuh a ni," tiin, Ngaizela saza bakah Mizorama nungchangte humhalhtu ni ṭheuh turin Mizoram mipui an ngen.

Vote chhiar dan tur sawiho

Serchhip additional DC Lalnundika hoin nimin khan DC meeting hall-ah MLA inthlanpuia vote tlate chhiar tura inpuahchahna atan counting hall hmunhma tur te, venhimna chungchang te, chanchinbumite dawnsawnna tur media centre ruahman dan tur te, sorkar hnathawk vote chhiar tura inruat dan tur leh training neih dan tur leh, training-na hmun turte sawiho a ni.

Thisen pe

ṬKP, Bawngkawn Unit chuan nimin khan an kohhran hall-ah Synod Hospital Blood Centre tan thisen unit 30 an pe a, petute mipa 26 leh hmeichhia pali an ni. YMA, Kolasib Project Veng Branch pawhin Project Veng VC House-ah Kolasib District Hospital tan thisen unit 24 an pe a, petute mipa 19 leh hmeichhia panga an ni.

58th ATC Day

Aizawl Theological College (ATC) chuan vawiin hian an hmunah College Day vawi 58-na an lawm dawn a; Mizoram Synod hotute bakah, Mizoram University registrar Prof. Lalnundanga te'n an hmanpui ang.