Mizoram Fish Festival buatsaih

National Fisheries Deve-lopment Board (NFDB) bultumin Fisheries department chuan nimin khan Aijal Club Park-ah ni hnih awh tur Mizoram Fish Festival an buatsaih a; Fisheries secretary C Lalzahngoa'n a hawng.

Fish Festival-ah hian dawr 10 hawn a ni a, Mizo thar sangha leh báwma khàwi chi sangha Mizorama buatsaih te, lèn, nghakuai, sangha khawina báwm (aquarium), sangha chaw hrang hrang leh sangha aṭanga ei tur siamte zawrh a ni. Pachhunga University College leh Fisheries department-te'n Mizoram chauha awm sangha chi (species) hrang hrang an pho lang bawk.

Festival hawnna inkhawm hi Fisheries director F Vanlallawma'n a kaihruai a; khuallian C Lalzahngoa chuan, NFDB bultuma PMMSY sum hmanga Fish Festival huaihawt a ni chu tualchhunga sangha khawitute leh sangha kaihhnawih thila sumdawngte tan inpho chhuahna hun ṭha a nih thu a sawi a, "Mahni ram thar chhuah ngei kan inhlutpui hian kan inpui tawn a ni," a ti.

Mizorama sanghate fuan hun lai a nih avangin kumin October 10 aṭanga December 18 thleng luia sangha man khap a nih thu sawiin Lalzahngoa chuan, "An inthlah pun hun lai a nih avangin Fisheries department-in sangha man phal loh hunah a puang a ni," a ti a; man phal loh chhung chuan luia sangha leh lui dunga nungchangte man lo turin mipui a ngen.

Fisheries joint director Laltleipuii chuan, Mizoramah sangha dil hectare 5,000 chuanga zau a awm thu a sawi a; lui dung humhalhna lamah Fisheries department-in Central YMA-te nena hma an lak mek thu leh lui sanghate a pun ngei beisei a nih thu a sawi bawk.

Fish Festival hawnnaah hian regional leh national level-a best fish farmers award dawng tawh mi pali - Hmangaihthanga, Serchhip (2018), F Laldingliana, Champhai Kahrawt (2019), Lalzamliana, Buhchang (2022) leh Lalthanliana, Kolasib (2023)-te hnenah lawmpuina hlan a ni.