Scholarship sem phûtin zirlaite'n MSB office-a kal turte an dang : Nizan aṭangin chaw an nghei ṭan

MZP bultumin zirlaite chuan scholarship sem chhuah phûtin nimin khan Mizoram Scholarship Board (MSB) office-a kal turte an dang. An beisei ang thu lawmawm an hmuh loh avangin tiam chin awm loin nizan aṭang khan chaw an nghei ṭan.

Zirlaite chu nimin zing dar 8:30 vel aṭangin MSB office kawtah an pungkhawm a, thuziak kengin MSB office luhna leh a chhehvelah an ṭhukhawm. Dan leh thupek kengkawhtu lamte pawh an awm a, hun eng emaw chen an awm hnuah office kal luih tum an awm loh avangin zirlaite chu an ṭîn darh.

An hmalaknain awmzia a nei loa an hriat avangin MZP hruaitute chu nimin tlai khan an ṭhukhawm a, scholarship pek chhuah ngei a nih theih nan chaw ngheia lungawi lohna lantir an rêl. An rorel ang hian mi eng emaw zat chuan nizan aṭang khan MZP pisaah tiam chin awm loin chaw an nghei ṭan a ni.

Scholarship pek chhuah an phût chungchangah hian MZP hruaitute chuan nimin khan chief minister Zoramthanga chu a pisaah an kâwm.

MZP thuchhuah tarlan danin, CM Zoramthanga chuan zirlaite scholarship second instalment chu Mizoram sorkarin MSB account-ah a thun tawh thu leh inthlan neih zawh a ni tawh a, party tan hamṭhatna awm thei thil a nih tawh loh avangin sem thuai ni se a duh thu a lo hrilh. Zirlaite scholarship pe thuai turin Higher & Technical Education (HTE) leh MSB hotute a hrilh nghal bawk.

HTE secretary Esther Lalruatkimi pawh MZP hruaitute chuan nimin vêk khan a pisaah an hmu a; Esther Lalruatkimi chuan, Election Commission of India phalna tel lo chuan an sem ngam loh thu a lo hrilh. MZP chuan, zirlaite mamawhna hriaa sem mai tur leh ECI lam pawh nawr ve turin an ngen a ni.

Tarlan tawh ṭhin angin, zirlaite scholarship second instalment táng zat hi cheng nuai 1,787.48 a ni a, Mizoram sorkar kutah September 25, 2023 khan a lut tawh a ni.