Video siama intihsiakah Chawngtlai PES leh Aizawl Venglai Kohhran an thiam ber

Synod Information department (Synfo) leh Mizo Sunday School Union (MSSU) ṭang dun Naupang Pual Media chuan tleirawl inkhawm leh presbyterian english school (PES) naupangte tana video tawi insiamsiak an buatsaihah Aizawl Venglai Kohhran leh Chawngtlai PES pakhatna an ni.

Video tawi insiamsiakah hian thupui chu 'Chhandamtu ropui' tih a ni a; November 10, 2023 zan khan Synfo Studio-ah result puan niin, lawmman sem nghal a ni.

Tleirawl inkhawm bika video insiamsiakah tualchhung kohhran 41 aṭangin video thehluh a ni a, chu'ng zinga pakhatna chu Aizawl Venglai Kohhran a ni. Pahnihna chu Zonuam East Kohhran a ni a, Zemabawk North Kohhran chu pathumna an ni. Champhai Vengthlang, Chanmari West Hmarveng, Ramhlun, Saikhamakawn leh Zarkawt kohhrante consolation prize dawng tura thlan an ni bawk.

PES-te tana video insiamsiakah sikul 21 aṭangin video a lut a, thupui chu 'Hlawhtlinna thurûk' tih a ni. Chawngtlai PES chu pakhatna an ni a, Hnahlan PES pahnihna niin, Ramthar PES chu pathumna an ni. Bethlehem Venglai PES, Bilkhawthlir Hmarveng PES, Ramhlun PES, Samlukhai PES leh Serchhip PES-te'n consolation prize an dawng.

Lawmman pakhatna dawngtute hnenah Rs 10,000 hlan a ni a, pahnihnate hnenah Rs 6,000 leh pathumnate hnenah Rs 4,000 hlan a ni. Consolation prize dawngtue'n Rs 1,000 ṭheuh an dawng bawk.