Vidyarthi Vigyan Manthan result puang

Vijnana Bharati (VIBHA), National Council of Educational Research and Training (NCERT) leh National Council of Science Museums (NCSM) buatsaih pawl 6-11 zirlaite puala India rama science talent search exam lian ber, Vidyarthi Vigyan Manthan (VVM) 2023 result puan a ni a; Guwahati-a State Level Camp Examination-a tel turin Mizoram aṭangin zirlai panga an tling.

VVM 2023 hi Mizoramah chuan Mizoram Science Centre-in an buatsaih a; zirlaite'n science thiamna, hriatna leh tuina an neih theihna tura buatsaih a ni. India ram pum huap exam-a ti ṭha zualte'n lawmman pawisa an dawn dáwn bakah, India rama science institution leh laboratory ṭhaahte training leh internship an ti thei dawn a ni.

Exam chhâwng khatna chu October 29-30, 2023 khan online-in buatsaih a ni a, Aizawl district aṭangin zirlai eng emaw zat an exam. Exam result chu November 11, 2023 khan tihchhuah a ni a; inelna chhawng hnihna Guwahati-a State Level Camp Examination-a tel turin Mizoram aṭangin zirlai panga an inziak tling a ni.