Tuibual camp-a Myanmar sipai 29 Mizoramah an rawn tlânchhe lut

Myanmar-a mipui sipai, Chin National Defence Force (CNDF)-te'n Tuibuala Myanmar sipai camp an lak avanga tlanchhia Myanmar sipai 29 chu nimin khan Vaphai Saikhumphai, Mizoramah an rawn tlânchhe lut a, Assam Rifles-in an buaipui zui.

Tarlan tawh angin, Myanmar sipai Tuibual camp chu November 14, Thawhlehni zan khan CNDF-te'n beiin an la a; chuvang chuan Myanmar sipaite chu tlanchhiain, an zinga 29 chu November 15, Nilaini khan Mizoramah luh an tum a ni. Mizoramah luh an tum thu hi hriain Champhai SDPO, Assam Rifles mite leh Vaphai khawtlang hruaitute'n Ṭiau lui kama Saikhumphaiah an lo nghak a ni.

Vaphai YMA hruaitute hnen aṭanga thu dawn danin, Myanmar sipai 29-te chu November 15-ah Mizoramah an lut lo a, nimin khan luh an tum tih hriat a nih avangin zing dar 10 vel aṭangin police te, Assam Rifles-te leh khawtlang hruaitute'n an lo nghak a, chawhnu dar 2 velah Saikhumphaiah an lut a ni.

Myammar sipaite chu Saikhumphaiah awm rei loin, Assam Rifles hoin lirtheiin an hruai chhuak nghal tih Vaphai Saikhumphai YMA hruaitute chuan an sawi a; AR hoin khawi lamah nge an hruai tih an hriat zui loh rualin, Myanmar lama haw turin an thawn leh mai tura an ngaih thu an sawi bawk.

Tarlan tawh angin, November 13, 2023 Thawhṭanniah People's Defence Force (CDF)-te'n Khawmawi leh Rihkhawdar khuaa Myanmar sipai hmunte an lak avanga Myanmar sipai tlânchhia mi 42 chu November 13 zan leh November 14 zingah Zokhawtharah lutin Mizoram police-in an lo kawl a ni. Ministry of Home Affairs thu anga Assam Rifles-in Hnahlanah an hruai a, Myanmar-a thawn kîr turin Indian Air Force helicopter-in Hnahlan helipad aṭangin phurh chhuah an ni.