Energy Conservation Day hmang Mizoramah power mamawh 10% vel siam
Nimin December 14 kha National Energy Conservation Day (Energy Renchem Inzirtirna Ni) a ni a; he ni pual hian Power & Electricity department hnuaia State Designated Agency for Energy Conservation, Electrical Inspectorate chuan Synod Conference Centre-ah hun an hmang a, P&E engineer-in-chief Lalduhzuala Sailo-in a hmanpui. Mizoramin kawlphetha a mamawh zat aṭanga 10% vel chiah a siam chhuak tih tarlan a ni.
Lalduhzuala Sailo chuan, energy chu renewable leh non-renewable-ah ṭhen a nih thu sawiin, "Energy conservation tih hian hman loh tawp lam a kâwk lo a, renchem taka hman chhun ang ang ṭangkai thei ang bera hman hi a tum a ni. Energy kan siam chhuahnate a tlem tulh tulh a, siam chhuahna dang hmun chhuah a nih loh chuan rei min daih tawh dawn lo a, renchem a ṭul," a ti.
Hripui vangin kum dang angin National Energy Conservation Day hman theih a ni lo tih sawiin P&E E-in-C chuan, a hmangtu ang angte'n hlâwk taka an hman a beisei thu a sawi.
Kawlphetha renchem dan tur sawifiahtu Electrical Inspectorate-a project coordinator Vansangliana sawi danin, chawhrualin Mizoramin ni khatah kawlphetha megawatt (Mw) 100 vel a mamawh. Mizoramin kawlphetha siam chhuahna a neih aṭangin Mw 29.85 siam theih a ni a, mahse, chawhrualin Mw 10 vel bâk siam chhuah a ni ngai lo.
Mizorama hydel project lian ber Tuirial Hydro Electric Power Project chu NEEPCO enkawl a nih avangin Electrical Inspectorate-in Mizoram sorkarin kawlphetha a siam chhuah theih zat an chhûtah a tel lo.
India ram hi kawlphetha hman tam lamah leh siam chhuah tamah khawvelah pathumna a ni a, chutih laiin, kawlphetha siam chhuahna atana hman 63% chu hman a nih tawh hnua hman zui theih loh (non renewable) a ni. Inrenchem taka hman a nihin siam belh a nih loh pawhin ni khatah Mw 25,000 vel khâwl theih a ni.
National Energy Conservation Day hmannaah hian Electrical Inspectorate chief electoral inspector R Romawia pawhin thu a sawi a; mipui leh zirlaite puala essay inziahsiaka ti ṭhate hnenah lawmman an hlân nghal.