NIT buaina MHA-in a zawtfiah Buaina hi tha taka chinfel a ni - Director

Tun hnaia National Institute of Technology (NIT), Mizorama buaina thleng chu Ministry of Home Affairs chuan NIT, Mizoram hotute thil awm dan a rawn zawtfiah. Boys hostel-a buaina thleng vang hian driver pahnih bân an ni a; NIT-Mizoram director chuan buaina hi ṭha taka chinfela nih tawh thu a chhuah.

NIT Mizoram Boys Hostel-I (Saizahawla Bording School ṭhin)-ah March 26, 2016 zanah buaina a chhuah avang leh invauna a thlen avangin Boys Hostel-I warden Bidesh Roy chuan March 17, 2016-ah Zonuam Police Out Post-ah FIR a thehlut a ni.

FIR-a an ziah danin, March 16 zanah NIT-Mizoram van pakhat driver Rintea leh NIT bus driver VR-a ten iron rod keng chungin zirlaite khawihah an vau tih B.Tech 1st. year zirlai pakhat hnen aṭangin report an dawng a; chuvang chuan a ṭul anga hma la turin police-te an ngen.

Hetih lai hian, NIT-Mizorama 1st. year zirlai pakhat, Rohit Kumawat, Boys Hostel-I a awm, Rajasthan lam mi chuan Facebook-a 'PMO India' tih page-ah complaint a ziak. Chutah chuan Mizoram aṭanga Mizo zirlai te, ambulance driver, hostel vengtu (guard) leh an ṭhian Mizo dangte'n kut an thlak thu te; hostel matron leh Mizo zirlaite'n nasa taka an vau thu te; an hlauh thu leh venhim an nih loh thu te a inziak.

NIT Boys Hostel-I a thil thleng chungchang hi Vanglaini chuan a hmunah a enfiah a; zirlai lo awmte chuan Rohit Kumawat-a'n PMO India page-a thu a post chu thu dik lo a nih thu an sawi.

NIT zirlaite sawi danin, March 16 zanah hostel mess khâr tawh hnu, dar 10 hnuah hnam dang zirlaite'n chaw ei an tum a, chu chu driver Rintea chuan a hau a, zirlaite nen chuan an intibuai zui a ni. An intibuai chu 1st. year Mizo zirlaite leh guard-te'n an ṭhelh a; hnam dang zirlaite chuan Mizo zirlaite leh guard-te chu driver chhanah an puh zui a ni.

March 17 zingah an class kal tur bus-a an chuang chu bus driver VR-a chuan seat hmasa berah Mizo chuang turin a ti a, hnam dang zirlaite chu bus aṭanga chhukin, driver chu an din hual a; driver chuan bus chhunga lever chuhin, ṭan a khawh ve thung.

Mizo zirlai pakhat chuan, March 17 hian hnam dang zirlaite hian lungawi lohna lantir an tum lawk nia a hriat thu sawiin, "Tumahin bag pawh an ak lo. Ni dangah pawh driver-in seat hmaa hnam dang ṭhu lo tura an tihin an insawn mai ṭhin. He mi ni hian bus aṭangin an chhuk a, ke-in an kal a ni," a ti.

NIT Boys Hostel-I a thil thleng hi hnam dang zirlaite chuan thuneitute hnenah an thlen a, driver pahnih - Rintea leh VR-a te chu thuneitute'n an bân nghal a ni.

Mizo zirlaite chuan driver-te chu thu zawhfiah awm loin an ban niin an sawi. Zonuam Police Outpost-ah FIR thehluh a nih avang hian police-te chu hostel-ah zan hnih an duty niin an sawi bawk.

Thil thlen dan hi Mizo zirlaite chuan MZP hnenah an hriattir tawh a, chief minister Lal Thanhawla hnenah pawh March 19, 2016 khan ziakin an thlen tawh bawk.

NIT-Mizoram office-a superintendent Benjamin Lalbiakmuana chuan, zirlaite aṭanga complaint a awm avanga FIR thehlut an nih thu a sawi a, "Police-te'n thu zawhfiah ngaite an zawtfiah a, action lak ngai ang ang an ti tawh," a ti.

Driver pahnih bàn chhan zawhna chhangin Benjamin Lalbiakmuana chuan, driver-te chu contractor kaltlangin a nghet loa rawih an nih thu a sawi a, "Contractor hnenah i driver-te hi lo chawlhtir rawh kan ti a, contractor-in a chawlhtir mai a ni," a ti. Driver-te thu zawhfiah an nih leh nih loh zawhna chu, an zawhfiah thu a sawi lo thung.

Benjamin Lalbiakmuana chuan, Boys Hostel-I a thil thleng leh PMO India page-a thu post-te chu thil pawi tak a nih thu sawiin, "Ministry of Home Affairs pawhin min rawn zawtfiah a, DC-ah report kan thehlut tawh," a ti.

NIT-Mizoramah hian 1st, year zirlai 45 an awm a, chung zinga pasarih chu Mizo niin, a bak zawng chu hnam dang an ni.

Prof UC Ray, director, NIT-Mizoram chuan March 21 khan thuchhuah siamin thuneitute'n ṭha taka an chinfel tawh thu leh, a ṭul ang an chhui zui zel thu a tarlang a; zirlaite pawhin ṭha takin class an chhunzawm leh tawh a ni.