Minimum wages rate thar April-ah

Labour, Employment & Industrial Training (LEIT) minister Lalrinmawia Ralte chuan, MNF member Lalruatkima zawhna chhangin, minimum wages siam thar chu Cabinet-in a pawmpui chuan April 1, 2016 aṭanga hman ṭan tum a nih thu House a hrilh.

Lalrinmawia Ralte sawi danin, minimum wages hman lai chu October 1, 2013-a hman ṭan a ni a; rate hman mek chu unskilled Rs. 220, semi-skilled Rs. 250, skilled-II Rs. 310 leh skilled-I Rs. 380 a ni. Minimum wages thar turah chi hniha siam a ni a, casual/muster roll leh road and building operations leh employment in factories tih a ni.

Rate thar ruahmanah casual/MR hlawh atana ruahman chu unskilled Rs. 270, semi skilled Rs. 300, skilled-II Rs. 370 leh skilled-I Rs. 460 a ni. Road and building operations leh employment-in factories hlawh tur chu unskilled Rs. 270, semi skilled Rs. 290, skilled-II Rs. 370 leh skilled-I Rs. 460 a ni thung.