Sorkar pisa fai thlanna result puang

UDPA department-in March 1-15, 2016 inkara sorkar pisa fai leh fai loh an endiknaah ZIDCO, Fisheries department leh Accountant General office-te chu Pakhatna an ni.

UDPA director Zorammuana chuan nimin khan Aizawl Press Club-ah thuthar thehdarhtute kâwmin, Aizawla pisa fai an thlan result a puang a ni.

Zorammuana chuan, sorkar pisa fai thlanna chu Swachh Survekshan hnuaia neih a nih thu sawiin, bitum bik neia hmalak a nih thu a sawi a, "Sorkar laipui ruahman angin Aizawla dawrte pawh endik leh thuai an ni dawn," a ti. Faina lama hmasawn turin tlawmngai pawl - YMA, YLA leh MTP-te nen an thawhho mek thu a sawi bawk.

UDPA department-in sorkar laipui duh dan anga faina lama an hmalakna kal zelah pisa fai thlan chhuah hi an hmalakna hmasa zinga mi a ni a; 'Special thematic drive in govt. offices and building' hnuaiah hian Aizawla sorkar department office 62 an endik a ni.

Pisa endikte chu zun-in an neih zat, inthiarna seat an neih ṭhat dan, kut silna awm dan, pisa chhung leh a vel vawnfai dan, bawlhhlawh báwm a awm ṭhat leh
ṭhat loh te, banga chinai tah leh tah loh te, chil pikna hnûhmá a awm leh awm loh te, hmanraw chhia leh bungraw hluihlawn tawh pindan chhung, inkalpawhna laia a awm leh awm lohte an enfiah a ni.

Aizawla sorkar pisa fai zualte

Pakhatna

(a) ZIDCO

(b) Fisheries department

(c) Accountant General office 

Pahnihna

(a) Excise & Narcotics commissionerate

(b) Mizoram Board of School Education

Pathumna

(a) Administrative Training Institute

(b) P&E E-in-C office

(c) ICT directorate

(d) Agriculture directorate

Palina

(a) Information & Public Relations directorate

(b) Tourism directorate

Pangana

(a) Registrar of Cooperative Societies office

(b) PHE E-in-C office

(c) SCERT directorate