KHAWTHLIR

Mamitah training

Ministry of Drinking Water & Sanitation bultumin Mamit district chhunga khaw 40-a village council, MHIP leh Water Sanitation Committee-te pualin nimin khan Mamit Chhimveng YMA-ah tuihna humhalh leh tuihnár venhim leh vawn ṭhat dan zirna buatsaih a ni.

Dry day puang

Excise & Narcotics Commissioner chuan, Mizoram Liquor (Prohibition and Control) Act, 2014 Section 11 hmangin March 24 leh 25 chu zu zawrh phal loh ní, dry day a nih thu a puang. March 24 hi Holi a ni a, March 25 hi Good Friday a ni.

Awareness camp

Mizoram KVI Board chuan, nimin khan IPR Auditorium-ah 'Handmade paper and fibre industry' tih thupui hmangin awareness camp an buatsaih. KVI Board executive officer Lalnuntluangi'n a kaihruai a; Mizoram hmun hrang hrang aṭanga kal khawmte hnenah paper hmanga thil chi siam dan leh hman dante an zirtir a ni.

Duhsakna hlan

MNF president Zoramthanga chuan, nimin khan Myanmar second vice president atana Zo hnahthlak tling thar, Van Thiao hnenah lehkha a thawn a; vice president-a a tlin avanga lawmpuina leh duhsakna a hlan.

DA pung dawn

Sorkar laipuiin a hnuaia thawkte hnena dearness allowance (DA) 6% (113% - 119%) a pek angin, Mizoram sorkar pawhin a hnuaia thawkte chu April 1, 2016 aṭangin DA pung a pe dawn. DA pung hi sum faia pek tura ruahman a ni.

Lawngtlai DC

Lawngtlai DC thar A Muthamma, IAS chuan nimin khan a hna a zawm. DC thar hian nimin khan Lawngtlaia sorkar officer pawimawhte a kâwm
nghal a, sorkar hma-laknate ṭha taka kalpui a nih theihna atan theihtawp chhuah a tum thu a sawi.