Mizoramah kum chanve chhungin thisen unit 18,673 pek a ni

Sorkar kum kal mek 2023-24 ah kum chanve chhungin Mizoramah thisen unit 18,673 pek a ni a, chu'ng zinga unit 17,072 chu pek bik nei loa a thlawna pek (voluntary donation) a ni.

Mizoram State AIDS Control Society hnuaia Blood Transfusion Service chhinchhiah danin, sorkar kum kal meka kum chanve, April-September, 2023 chhunga Mizorama a thlawna thisen pek zat unit 17,062 chu pek zawng zawng unit 18,673 aṭangin 91.37% a ni a; unit 1,611 (8.63%) chu pek bik nei (replacement) a ni thung.

Kum chanve chhunga voluntary blood donation sanna ber chu Christian Hospital, Serkawn niin, 99.57% a tling a, Lunglei Civil Hospital-in dawtin, 99.37% a ni. Voluntary donation hniamna ber chu Lawngtlai District Hospital niin, 79.36% a ni a, a hniam ber dawttu Civil Hospital Aizawl-ah 88.21% a ni.

Civil Hospital, Aizawlah thisen pek zat tam berin, unit 8,875 pek a ni a, a dawttu Civil Hospital, Lungleiah unit 1,891 pek a ni. Thisen dawng tlem ber Mamit District Hospital-in unit 232 an dawng a, unit 421 dawngtu Serchhip District Hospital-in an dawt.

Mizorama blood centre/bank 11-te'n kum chanve chhungin blood donation camp ṭum 317 an nei a, chu'ngah chuan thisen unit 12,046 pek a ni. Blood donation camp-a pek zat hi pek zawng zawng aṭangin 64.51% a tling.

Donation camp nei tam ber Civil Hospital Aizawlin camp 114 neiin, chu'ngah chuan thisen unit 5,145 an dawng a, camp nei tlem ber Mamit District Hospital-in ṭum 10 neiin, chu'ngah chuan unit 121 an dawng a ni.

Sorkar kum liam ta April 2022 - March 2023 chhung khan Mizoramah thisen unit 37,419 pek a ni a, chu'ng zinga unit 34,252 (91.54%) chu voluntary donation a ni. Kum 2021-22 chhungin unit 28,191 (voluntary 90.08%), kum 2020-21 chhungin unit 26,658 (voluntary 89.66%), kum 2019-20 chhungin unit 30,448 (voluntary 90.90%), kum 2018-19 chhungin unit 27,079 (voluntary 83.36%) pek a ni bawk.

Association for Voluntary Blood Donation (AVBD), Mizoram hruaitute chuan, kum kal mek 2023-24 chhunga voluntary blood donation target an siam chu 92% a nih thu sawiin, kum chanve chinah chuan target a la tlin loh thu an sawi.

AVBD hruaitute chuan, mi nunna chhan tura páwl hrang hrangte inpekna chhuanawm an tih thu an sawi rualin, blood donation camp ṭum khata thisen pek ṭheuh tum kher lo a, zing zawka donation camp huaihawt uar turin pawl hrang hrangte an chah a ni.