MSB-in scholarship an sem chhuak: MZP-in chawnghei an kalpui an titawp

Scholarship second instalment sem phûtin MZP chuan November 16, Ningani tlai aṭang khan MZP pisaah chawnghei an kalpui ṭan a, Election Commission of India (ECI)-in scholarship sem phalna a rawn pek avangin Ningani zanah vêk chawnghei an titawp. Mizoram Scho­lar­ship Board (MSB) chuan nimin khan tribal scholarship second instal­ment sum an sem ṭan.

Scholarship second instalment sum chu Mizoram sorkarin Sep­tember 25, 2023-ah sorkar laipui aṭanga a dawn tawh avangin MZP chuan November 14 &15 khan MSB pisa tualah lungawi lohna an lantir a, awmzia a neih loh avangin November 16 khan MSB-a thawkte pisa kai tur an dang a ni.

Ni thum chhunga an hmalaknain awmzia a neih loh zel avangin November 16, Ningani tlai aṭangin MZP pisaaah chawnghei an kalpui ṭan a, mahse, ECI-in scholarship sem chhuah phal a nih thu Mizoram sorkar a rawn hriattir avang leh, MSB lamin sem nghal an tum tih an finfiah avangin November 16 vêk zan dar 8:30-ah chawnghei an titawp.

Thu dawn danin, MSB chuan nimin chawhnu lam khan zirlaite bank account-ah scholarship an thun a, chutih rualin an thun kim hman lo a, a tahtawla thun zel an tum. Tribal scholarship first instalment chu February 2023 khan zirlaite'n an dawng tawh a ni.

MZP chuan, scho­larship chu a dawng tur zirlai zawng zawng bank account-ah a luh vek hma chuan an en zui zel dawn tih an tarlang.