Vote chhiar hun sawn chungchang bawhzui dan tur CYMA-in ngaihtuah

Mizoram Legislative Assembly inthlanpuia vote tla chhiar hun sawn tura ngenna awm tawh chungchangah Central YMA chuan hma an la mek a, nizan khan Central Executive Committee (CEC) ṭhukhawmin, hmalak zel dan tur an ngaihtuah.

Vote chhiar hun chungchang hi Central YMA office bearer-te chuan November 16, Ningani khan an lo sawiho tawh a, nizana CEC ṭhutkhawma ngaihtuah zui turin an dah. Nizana YMA CEC ṭhutkhawmah hian ngaihtuah a ni a, an thutlukna erawh hriat hman a ni lo.

Central YMA president Lalhmachhuana chuan, NGO Coordination Committee anga hmalak chungchang chu YMA CEC ṭhukhawmin thu an tihtluk dan azir a nih tur thu a sawi. CYMA general secretary Dr Malsawmliana chuan, a ṭul a nih chuan Delhi-ah ECI hotute pawh an la dàwr a rinawm thu a lo sawi tawh bawk.

Tarlan tawh angin, Mizoram chief electoral officer (CEO) Mahdup Vyas chuan tun hnai khan Delhi-ah ECI hotute a kâwm a, Mizoram inthlanpuia vote chhiar hun tura ruat December 3, 2023 (Pathianni) chu tihdanglam a nih dawn loh thu an lo hrilh a ni.

ECI-in Mizoram MLA inthlanpui vote chhiar hun atana a ruat December 3, 2023 chu Pathianni a nih avangin Pathianni leh Inrinni ni lo, ni dangah sawn turin Mizoram Kohhran Hruaitute Committee (MKHC), Mizoram People Forum, NGO Coordination Committee leh political party hrang hrangte'n a hrang ṭheuhin ECI an ngen tawh.

ECI aṭangin chhànna a awm loh avangin MKHC chuan ngenna an thlen nawn a, chumi hnuah pawh chhanna a awm loh avangin tlawmngai pawl leh political party hrang hrangte sáwm khawmin November 2, 2023 khan hmalak zel dan tur an sawiho a ni. Chumi hnuah pawl hrang hrangte chuan a huhoin ECI-ah ngenna an thlen leh bawk.

ECI aṭanga chhanna a awm loh zel chuan, bawhzuia hmalak zel chungchang chu MKHC chuan tlawmngai pawlte kutah a dah a ni.