ATC Day vawi 58-na lawm a ni

Aizawl Theological College (ATC) chuan nimin khan an hmunah College Day vawi 58-na an lawm a, Mizoram University registrar Prof. Lalnundanga leh Mizoram Synod hruaitute'n an hmanpui.

ATC Day lawmna hi Synod moderator Rev. Dr C Chawnghming-liana'n a kaihruai a, ATC principal Rev. Prof. Tlanghmingthanga'n an dinhmun tlangpui a sawi. Synod senior executive secretary Rev. C Zorammawia leh Synod secretary Upa B Lalhmunliana ten zirlai ti ṭha zualte hnenah lawmman an hlan.

Inkhawma speaker Prof. Lalnundanga'n 'Education from Christian perspective' tih thupui a sawi a, tunlai khawvel inthlâk danglam leh, a bikin New Education Policy vanga Kristiante tana chona inchhawp leh mawhphurhnate a sawi a ni.

ATC hi kum 1907-ah Rev. DE Jones (Zosaphluia) hoa din a ni a, tunah hian Pathian thu zirna regular course pathum - Bachelor of Divinity, Master of Theology leh Doctor of Theology-ah zirlai 204 an awm mek a; heng bakah hian Senate of Serampore College páwn lam aṭanga zirna BCS, DCS leh DCPC zirnate a awm bawk.