ASF vangin vawk 72,137 thi/suat tawh

Kuminah vawk pùl hri, African Swine Fever (ASF) vangin vawk 1,035 a thi a, vawk 732 suat a ni a; ASF lèn tirh aṭangin Mizoramah ASF vangin vawk thi/suat 72,137 a awm. Hetih lai hian, ASF a léng tawh rih loa hriat a ni.

AH&Vety department aṭanga thu dawn danin, Mizoramah kuminah November 2, 2023 thleng khan ASF vanga vawk thi a awm a, November 3 aṭanga nimin thleng khan ASF kaihhnawih vawk thi report a awm tawh rih lo.

Kuminah May 5 aṭangin Mizoramah ASF vanga vawk thi a awm ṭan a, November 2, 2023 thlengin district pasariha khua/veng 33-ah vawk 1,035 a thi a, ASF darh zel tur vèn nan vawk 732 suat a ni.

ASF vang hian March 2021 aṭangin Mizoramah vawk a thi ṭan a; March 21, 2021 aṭanga December 31, 2021 chhungin ASF vanga vawk thi 33,417 leh suat 12,568 awmin, a vaiin 45,985 a ni. Nikum 2022 khan February thla aṭangin Mizoramah ASF hri a darh leh a, 2022 chhungin vawk 12,791 a thih bakah, vawk 11,594 suat a ni a, kum 2022 chhunga ASF vanga vawk thi leh suat zawng zawng chu 24,385 a tling.

Kumin 2023-ah May thla aṭangin Champhai district-ah ASF vangin vawk a thi leh ṭan a; May 5 aṭanga November 2 thlengin district pasariha khua/veng 27-ah ASF a léng tih finfiah niin, hri vanga vawk thi leh hri darh tur ven nana suat zawng zawng chu a vaiin 1,767 a ni.

Mizorama ASF a léng tih finfiah a nih ni, March 21, 2021 aṭanga November 2, 2023 thleng khan ASF vangin vawk 47,243 a thi tawh a, vawk 24,894 suat a ni bawk a; ASF kaihhnawiha Mizorama vawk thi/suat tawh zawng zawng chu 72,137 a tling.

ASF vanga vawk thi zat hi a lèn ṭan aṭanga chhûtin kum tin a tlahniam a; ASF vanga vawk thi/suat zawng zawng 72,137 zinga 45,985 (63.75%) chu kum 2021-a mi a ni. Kum 2022 khan vawk thi/suat 24,385 awmin, vawk thi/suat zawng zawng aṭangin 33.80% a ni a, kumin 2023-a vawk thi 1,767 hi kum thum chhunga ASF vanga vawk thi/suat zawng zawng aṭangin 2.45% chauh a ni tawh.