Myanmar sipai Mizorama tlanchhiate Assam Rifles-in an la kawl rih

Myanmar-a mipui sipai, Chin National Defence Force (CNDF)-in Chin state chhung, India leh Myanmar inrìna hrûla awm Tuibual khuaa Myanmar sipai camp an lak hnua Mizoram lama rawn tlanchhia Myanmar sipai 29-te chu Assam Rifles-in nimin thleng khan an la kawl.

Thu dawn danin, Myanmar sipai 29-te chu November 16, Ningani chawhnu dar 2 pelh hretah Vaphai khuaa veng pakhat Saikhumphai Ṭiau kai an thleng a, an ralthuamte nen Mizoram police kutah an inpe a ni.

Myanmar sipaite chu Mizoram police-te chuan Assam Rilfes hnenah an hlan chhâwng nghal a; nimin thleng kha chuan Assam Rifles-in an la kawl a, Myanmar lama thawn kîr hun tur an sawi thei rih lo.

Vaphai VC President chuan, Assam Rifles-in an ngen angin Myanmar sipaite tan mutbu leh thawmhnaw an pe tih a sawi a; Ningani zan khan Vaphaia AR camp-ah an dah nia an rin thu leh nimin lamah an sawn chhuah leh sawn chhuah loh an hriat loh thu a sawi bawk.

Chin National Organisation Vice President sawi danin, CNDF-te'n November 14, 2023 zanlai vela Tuibuala Myanmar sipai camp an beinaah, darkar 4 vel an inbeih hnuah Myanmar sipaite chu CNDF chuan inpe turin an hriattir a, Myanmar sipaite chu CNDF kuta inpe duh loin, Mizoram lam panin an tlanchhia a ni. CNDF-te'n mipui himna an duh avangin an ûm zui lo a, an kap zui lo a ni.