DIET Aizawl platinum jubilee lawm

District Institute of Education & Training (DIET), Aizawl chuan nimin khan an auditorium-ah Aizawl DIET kum 70 tlin, platinum jubilee an lawm a, School Education secretary Dr Lalzirmawia Chhangte-in an hmanpui.

Dr Lalzirmawia Chhangte chuan, DIET, Aizawla thawk leh zirlai zawng zawng duhsakna hlanin, "Zirlaite'n zirna ṭha an dawn chuan human resource ṭha tak kan nei dawn a, hemi kawngah hian DIET an pawimawh hle. Zirtirtu ṭha ni tur chuan inpekna tak tak a pawimawh a, zirtirtu hna hi noble profession a ni," a ti.

School Education Secretary chuan, zirna chu ram leh hnam darthlalang a nih a vangin zirtirtute'n mawhphurhna sang tak an nei tih sawiin, "Hna dang hmuh loh vanga zirtirtu hna thawk ve ringawt, hlawh lâkna tur chauha a rùn dâla thawk satliah an awm a nih chuan chu'ng zirtirtute chu kan ram leh hnam hmelma dik tak an ni," a ti a; DIET zirtirtute chu zirtirtute zirtir leh chhâwngtu an nih avangin an dinhmun a pawimawh hle tih sawiin, Mizoram hma lam awm dan hriltu an nih thu leh Mizoram zirna kalphungah thui tak mawh an phurh thu a sawi.

Jubilee lawmnaah hian School Education director Lalsangliana leh SCERT director Zohmingliani te khualzahawm an ni a; jubilee lawmna turin DIET Aizawla thawk mek leh thawk tawh ṭhinte'n Rs 8,89,509 an thawh khawm.

DIET, Aizawl jubilee lawmna hi November 10, 2023 khan ṭan a ni a, a bul ṭannaah hian thisen unit 73 an pe. November 13-ah social work hun hmangin DIET awmna veng hnai Ramhlun North leh Chaltlang veng tifaiin an hnatlang a, November 14-ah variety programme an hmang bawk.

DIET, Aizawl hi kum 1953-ah din a ni a; zirlai 340 an awm mek a, B.Ed zirlai 100 leh D.El.Ed. zirlai 240 an ni. Thawktu teaching faculty 38 leh non-teaching staff 19 an awm mek.