ECI-ah vote chhiar ni sawn duh thu thlen

Human Resource Development Board vice chairman Dr L Thangmawia chuan nimin khan New Delhi-ah Election Commission of India (ECI) pisa a tlawh a, Mizoram mipuiin MLA inthlanpui vote chhiar ni sawn an duh thu a thlen.

Sorkar thuchhuah tarlan danin, Dr L Thangmawia hi ECI principal secretary Darsuo Thang nen an inkawm a, a kutah Chief Election Commission hnena lehkha a thehluh tur a hlân a ni.

Dr L Thangmawia chuan CEC hnena lehkha a thehluhah chuan, Mizoram inthlanpui vote chhiar ni, December 3, 2023 chu Pathianni a nih avangin Mizorama political party hrang hrang, tlawmngai pawlte leh kohhrante duh dan angin December 4, 2023-ah emaw sawn tura ngenna a ziak.

MLA candidate, an vote neihna constituency ni loa candidate-te postal ballot-a vote thlak phalsak tawh ṭhin tura ngenna a ziak bawk a; candidate-te chu vote thlak ní-ah an dinna biala inthlan kal dante thlithlaia polling booth tlawh kual an duh ṭhin avangin vote an neihna biala vote thlâk tura haw a buaithlak thu a tarlang.

Dr Thangmawia chuan, Mizoram inthlanpui vanga zirlaite scholarship pek chhuah phal tura ngenna ECI-in November 16, 2023 tlaiah phalna a pek avangin ECI Principal Secretary chu lawmthu a hrilh bawk.