MLDB-ah sub-committee din rêl

Mizoram sorkarin Mizo ṭawng hmasawnna leh humhalhna lama hma la tura a din Mizo Language Development Board (MLDB) chu nimin khan an chairman R Lallianzuala hoin Directorate of School Education Committee Room-ah an ṭhukhawm a; tinzâwn bik neia hma latu tur sub-committee hrang hrang siam an rêl.

Ṭhutkhawmah hian, Mizo ṭawngin hma a sawn zel theihna atan tinzawn bik neia hma latu tur sub-committee hrang hrang siam te, A AW B (orthography) siam rem chungchang te, MINECO huam chhunga MLDB pisa hmun tur sorkara dil chungchangte an sawiho a ni.

Mizo A AW B hman meka 'Ng' awmna hmun chu tihdanglam a, 'N' leh '0' inkara dah chungchang an ngaihtuah bawk.

Lallianzuala chuan, MLDB chu Mizoram leh Mizo mipui tan a hlut thu a sawi a, "Hun lo kal zel tur atan méllung pawimawh leh chhinchhiah tlak tak Mizoram sorkarin a phun a ni. Khawvel hmasawnna ṭhang zelah kan ṭawngin hma a sawn ve zel a ngai a, chumi rual chiah chuan nasa lehzuala kan ṭawng humhalh tura hmalak a ngai," a ti.

Mizoram sorkar chuan September 29, 2023 khan Mizo Language Development Board member turte a ruat a, member-te chu kum thum chhung atan ruat an ni.

MLDB chairman secretary chu Vanlalṭanpuia a ni a; member dangte chu Prof. RL Thanmawia, Prof. Rualkhuma Colney, Rozama Chawngthu, H Ngurthansanga, Prof. Laltluangliana Khiangte, B Lalhmunliana leh Lalzarzova Khiangte te an ni. Ex-officio-ah MBSE Chairman, SCERT Director leh Art & Culture Director an awm bawk.