MPCC President-in lawmthu a sawi

Mizoram Pradesh Congress Committee (MPCC) president Lalsawta chuan, Mizoram inthlanpuiah Congress party-a senior tam takin mi dangte an ken avangin candidate-ah mi thar 33% an nei nia sawiin, lawmawm a tih thu a sawi.

Lalsawta hian nimina Congress Bhavan-a inkhawmah thu sawiin, "Tun inthlana kan senior tam tak, candidate atan la ṭha tak takte'n candidate chuh loa mi dangte an kian hi a lawmawm a, mi thar 33% lai candidate kan nei thei a, an chungah lawmthu ka sawi a ni," a ti.

Congress President chuan, Lal Thanhawla chungah a lawm thu sawiin, "Serchhipahte a han campaign a, a thawh hlâwkin kan lawm tak zet a ni," a ti a; party páwn aṭanga campaign puitu te, party chhunga ṭhahnemngai taka thawktu te, candidate-te chungahte a lawm thu a sawi.

MPCC senior vice president Lal Thanzara chuan, "Kan campaign chhung zawnga candidate-te leh campaigner-te min vengtu Pathian hnenah lawmthu kan sawi," tiin, ṭhahnemngai taka thawktute zawng zawng chungah a lawm thu a sawi a; MPCC vice president Lalnunmawia Chuaungo pawhin inthlanpuia an hmalakna zawng zawng avangin lawmthu a sawi bawk.

MPCC treasurer Dr Lalmalsawma Nghaka pawhin lawmthu a sawi rualin, "A pawimawh berah chuan kan tling emaw, kan tling lo emaw, kan bulṭhut lam tichak lehzual ang u," a ti.

Congress party inkhawm hi Lalrindika Ralte, MLA-in a kaihruai a ni.