Hlauthâwng miah loin MNF-in sorkarna kan lâk leh ka ring - Ruatkima
MNF party chuan nimin khan an pisa Mizo Hnam Rûnah chhung inkhawm an nei a, thu sawitu MNF adviser Lalruatkima chuan, Mizoram inthlanpui vote thlak zawh tâkah hlauthâwng miah loin MNF-in sorkarna an lâk leh a rin tlat thu a sawi.
Lalruatkima chuan, MNF sorkarin harsatna paltlang chungin mipui ni tin mamawh hnianghnâr takin a pe thei niin a sawi a, "Min dintu Pathian hian kawng laklawhah min kalsan lo ang tih ka ring tlat. Hlauthâwng miah loin MNF hian sorkarna kan lak leh ka ring tlat a ni. Hnehna kan chang a nih chuan mipui hnenah lawmthu sawi hi kan tih tur hmasa ber a ni ang," a ti.
MNF Adviser chuan, "Mizo-ram mipuiin inthlanna felfai kan kalpui thei a ni tih lantira a awm kha a ropui ka ti," a ti a; inthlan buaipuitu zawng zawng, MPF, kohhran, tlawmngai pawl leh venhimna hna thawktu police-te chungah a lawm thu a sawi.
'Sorkarna siam zo an awm lo ang, thawkho sorkar a din a rinawm' tih chu Mizoramah a la dik ngai lo tih sawiin Ruatkima chuan, "Party tê zawkin a lian zawk behchhana mipui hruai kâwi tuma an campaign auhlâ mai a ni. Inthlan zawh hnua thawhhona hi din chawp ngaiin a la thleng ngai lo," a ti.
Lalruatkima chuan, Mizoramah sorkar a inthlak apiangin party leader-te an dinnaah an tla ṭhin tih sawiin, "Kan leader Pu Zoramthanga hi a tlin loh hlauhna nei an awm lo. Chuvangin, he ram leh hnam tan hmachhawp hrang hrang kan neihte a hlawhthin theih nan Pathianin hun ṭha min pe ang a, sorkarna kan chang leh ngei ang," a ti a; inthlan zawh tâkah MNF party chu thawk rim leh taima, ṭangrual ṭha ber an nih thu a sawi.
MNF Adviser chuan, MNF chu Mizo nationalism bulpui, a kûngpui neitu nia sawiin, "Engtik lai mahin a nghîng ngai lo. MNF-in hnam thuthlung chawi kângin hma la lo se chuan hnam dang thlah fa kan hmeichhiate'n an âwi hle hle ang tih a rinawm," a ti.
Inthlan a zo a, tute pawhin beiseina sang tak nen inthlan result an nghâk mek tih sawiin Lalruatkima chuan, khawthlang lam leh chhim lam bial, minority tamna bial 10-ah hian MNF-in bial panga aia tlem lo an lak a beisei thu a sawi a, "Kan lak bâng hi Congress leh BJP-in an lak a rinawm," a ti a, bial 30 la awm aṭangin ZPM-in majority an neih phâk a rinawm lo niin a sawi.