Mahni sakhuaah ṭheuh rinawm hi kan kal dan a ni - BJP President

BJP, Mizoram Pradesh president Vanlalhmuaka chuan, BJP thil tum leh kal dan chu - hnam nunphung ṭheuh chawi nung a, mahni sakhuaah ṭheuh rinawm niin a sawi.

Vanlalhmuaka hian nimina Aizawla BJP pisaa inkhawmah thu sawiin, "Mizoram hian Mizo pa dik tak, Kristian dik tak ram hruaitu atan kan mamawh tawh. BJP chuan hnam culture ṭheuh chawi nung a, mahni sakhuaah ṭheuh rinawm hi kan tum leh kan kal dan a ni," a ti.

Inthlanpui zawh tâka Mamit biala BJP candidate Lalrinliana Sailo pawhin thu sawiin, "BJP hi kum 2024-ah pawh central-ah an la sorkar dawn tih hi mithiamte sawi dan a ni a, Mizoram budget tinung thar tur hian central-a la sorkar tur BJP bawk hi min khai chhuaktu atana pawimawh tak a ni," a ti. Mamit bial chungchang sawiin, "Kan hotute duhsakna changin hma kan han la a, nimahsela, Mamit bial hi sumdawn nan an hmang emaw tih mai tur khawpa a awm hi a pawi tak zet a, inthlana nasa taka sum buaia kan buai ta hi a pawi tak zet zet a ni," a ti bawk.