KHAWTHLIR

Fimkhur turin chah

Disaster Management and Rehabilitation department chuan Mizoramah ruahsur nasa tak leh thlipui thleng theih a nih avangin fimkhur turin mipui an chah. DMR Directorate chuan nimin khan SMS hmangin mipui hriattirna an thawn chhuak a, "November 17-18, 2023 chhung hian ruah nasa tak leh thlipui lo thleng thei a nih avangin mipuite fimkhur turin kan inngenin kan inhriattir e," an ti.

'Kan sûlhnu'

Mizoram sorkara minister hlui leh Lok Sabha member hlui CL Ruala lehkhabu ziah 'Kan sûlhnu' tih chu nimin khan Rev. Dr C Vanlalhruaia'n Aijal Club-ah a tlangzarh. Lehkhabu hi CL Ruala'n a chanchin a ziahna (autobiography) a ni a, ram hruaitu a nih laia a tawnhriat chi hrang hrang a ziak a ni.

Sahuan tlawh

Mizoram Nature Learning Centre team member-te leh zirlaite, mi 13-te chuan nimin khan Assam State Zoo cum Botanical Garden leh a chhunga Nature Learning Centre an tlawh. Mizoram team hi Guwahati sahuan enkawltute'n an lo dawngsawng a, Nature Learning Centre an din te, ramsa tawlh rûk dah khawmna hmun leh nungcha damlo an enkawlna Assam State Zoo Veterinary Hospital an fanpui. Mizorama Nature Learning Centre din thar mek leh Satellite Animal Rescue Centre din thar tana thil ṭul leh pawimawhte an zirho bawk.

Thisen pe

Aizawl Christian Academy chuan nimin khan Zoram Medical College Blood Centre tan thisen unit 20 an pe a, petute mipa 15 leh hmeichhia panga an ni.

Leiletah harsatna

November 16, Ningani aṭanga Airuah sûr avangin Champhai leileta buh seng a khaihlak nual. Thu dawn danin, tunlai hian Champhai leiletah buh an seng mek a, leilet buh neitu tam zawk chuan seng zo tawh mah se, buh vaw mek eng emaw zatte chu airuah sûrin buh phal a delh avangin harsatna an tawk a ni. Ruahin buh phalte a nan chuan an beisei zat an thar pha lo tlangpui tawh ṭhin niin an sawi.