Eiruk thubuaiah cabinet minister R Lalthangliana'n thiam a chang

Cabinet minister Dr R Lalthangliana chu eirûk thubuai pathumah Special Judge (Prevention of Corruption Act) Vanlalenmawia chuan thiam a chantir. Court chuan thutlukna hi nimin khan a puang.

April 19, 2012 khan MPCC mi leh sa Lalthanglura Ngurte chuan chanchinbua article chhuak behchhanin Dr R Lalthangliana lakah hian Anti Corruption Bureau (ACB)-ah FIR a thehlut. Dr R Lalthangliana chu sum lak luh leh thil neih inmil loah te, Rural Development department hnuaiah cheng nuai 32 tichingpenah leh a fapa SSA hnuaia music instructor-a dah a, hna thawk loa hlawh lâktirah a puh a ni.

Dr R Lalthangliana thubuai chungchang ACB-te'n an chhuina report leh thuhretute thusawi a ngaihthlak hnuah Special Judge chuan thutlukna siamin, R Lalthangliana chu thiam a chantir a ni.

Judgement-a tarlan danin, RD department hnuaia cheng nuai 32 chingpen anga sawi chu ACM-te'n an hmuh loh avangin chargesheet-ah an ziak lang lo. Dr R Lalthangliana fapa music instructor-a dah nia puh chungchangah pawh ACB chuan chhui zui tlakah an ngai lo a; a thil neih leh lâk luh inmil loa puhna chauh an chhui a ni.

ACB-te'n an chhuinaah chuan, Dr R Lalthangliana hi a sum lâk luh aiin a hman a tlem zawk avangin Special Court chuan thiam a chantir a ni.

Thiam a chan tâk avangin R Lalthangliana chu a laka thubuai thehluh a nih avanga bungrua leh thil dang hrènsakte pek kîr a ni ang.