2014-15 ah vbc. 74.55 man ran la lut Vawk chi ṭha lak luh tum ṭhulh a ni

AH&Vety minister C Ngunlianchunga chuan MNF member pahnih Dr. K Beichhua leh Lalrinawma zawhna chhangin, kum 2014-2015 chhungin state páwn aṭangin cheng vbc. 74.55 vel man ran lak luh a nih thu House a hrilh. Hetih lai hian, ram páwn aṭanga vawk chi ṭha lak luh tum chu ṭhulh a ni.

C Ngunlianchunga chuan, ar leh vawka intodelh a nih theihna atan ṭan an lak thu sawiin, "Tanhrilah ar note awp keuna siam a ni a, kum khatah ar notê 74,000 vel thar theih beisei a ni. Vawk inthlahpunna pawh Thingsul Tlangnuamah siam a ni a, kum khatah vawk 7,000 vel thar theih kan beisei. Kan mamawh zawng zawng phuhru thei lo mah ila, theihtawp kan chhuah a ni," a ti.

AH&Vety Minister sawi danin, ram páwn aṭanga ran lak luhte chu an len zawng emaw, an rih zawng emaw chhinchhiah a ni loa, a puitling leh notê tih ringawta chhinchhiah a ni. A man pawh a nihna chhiah hriat theih a ni lo a, local rate anga chhûtin cheng vbc. 74.55 man vel lak luh tawh a ni.

Ram páwn aṭanga vawk chi ṭha lak luh an tum chu ṭhulh a nih thu sawiin C Ngunlianchunga chuan, "Canada leh England-in health certifcate an pek chhuah chu India sorkarin a pawm lo a, a hnuah ram dang
aṭanga vawk lak luh phal a nih loh thu Mizoram sorkar hriattir a ni," a ti a; India sorkar thurawn angin ram dang aṭangin vawk chi
ṭha lak luh tuma ṭan lak mek a nih thu a sawi.

2014-15-a ran lak luh leh a man

Ran hming Lak luh A man

Vawk puitling 1,167 Rs. 2,10,06,000

Vawk notê 1,194 Rs. 41,79,000

Vawk notê (NLUP) 28,810 Rs. 14,05,50,000

Bawng talh tur 8,902 Rs. 40,05,90,000

NLUP bâwng 748 Rs. 4,86,20,000

Ui 1,576 Rs. 47,28,000

Ar puitling 1,09,259 Rs. 4,91,66,550

Ar notê 17,04,550 Rs. 7,67,04,750