Tuia harsatna tawh loh dan tur zirho

Central Water Commission (CWC) leh PHE department ṭangkawp chuan, nimin khan Aijal Club-ah Jal Kranti Abhiyan (2015-16) chungchang zirhona an buatsaih a, chief secretary Lalmalsawma'n a hawng.

Chief Secretary chuan, sik leh sa danglam zelin khawvel hmun hrang hranga tuihnâ a tihtlem sawt thu sawiin, "Tunlai thiamna hmanga tuihna humhalh a ṭul tak zet. Mihring pung zel leh hmasawnna kawnga intlansiakna nasa tak avanga tui lama harsatna tawh a nih lohna tura sorkar laipuiin Jal Kranti Abhiyan (2015-16) a kalpui hi a lawmawm hle a ni," a ti.

Workshop hi PHE secretary Dr C Vanlalramsanga'n a kaihruai a, CWC-a executive engineer M Sai Sudarsanam chuan CWC hmalakna hrang hrang leh Jal Kranti Abhiyan atana inbuatsaihnate a sawi.

Jal Kranti Abiyan hmalakna atan hian State Level Committee leh District Level Committee-te din a ni a, hmalakna hrang hrang kalpui a ni. Champhai district-a khaw pahnih, Mimbung leh Khuangthing khuate chu Jal Gram Yojana hmalakna bul ṭanna atana thlan a ni a, CWC chuan sorkar laipuiah DPR an thehlut dawn a ni.