Party politics chauh ngaihtuah ṭhinte'n Politics an tinu ṭhin - Lalrindika, MLA

Hachhek bialtu MLA Lalrindika Ralte chuan a nu Hrangthanmawii hriatrengna atan MJA hnenah ṭhutna (chair) 50 a pe a, chumi pual chuan nimin khan Aizawl Press Club-ah inkhawm tâwi buatsaih a ni. Lalrindika chuan, party politics chauh ngaihtuah ṭhinte'n politics an tihnut ṭhin thu sawiin, "Politics kan khelh dan tam tak hi kan bihchian a ngai," a ti.

Hachhek Bialtu MLA chuan, democracy-ah chuan politician-te chu ram leh hnam tana inpe an nih thu sawiin, "Politician-te dinhmun hi a sangin a ropui hle. Kan tui emaw, tui lo emaw, kan duh emaw, duh lo emaw, politics aṭanga tâl hrang thei tu mah kan awm lo," a ti a; politician-te chu mipui rawngbawla an hamṭhatna ngaihtuahtu tur an nih thu a sawi.

Politics chu a pawimawh êm avangin politician-te pawhin an zir a ngai tih sawiin Lalrindika chuan, "Politician zingah pawh party politics hi politics dik, a kalphung tur emaw ti tlat an awm," a ti.

Lalrindika chuan, "Vawiina kan politics khelh dan tam tak hi chu kan bih chian a, kan chhût chian a ngai ta hle. Party politics chauh ruihchilhte'n politics hmai an tibâl ṭhin," a ti a; khawvela ram leh hnam ropuite pawh politician ropui tak tak an neih vang a nih ṭhin thu a sawi.

MJA hnena chair a pek chhan sawiin Lalrindika Ralte chuan, "MJA-te hi mahni hrehawm pawisa loa hlâwkna, hmingṭhat leh chawimawina ûm hauh loa thu dik leh belhchian dâwl mipui tana chhawp chhuaktu in nih vang a ni," a ti a; MJA member-te chu ram leh hnam tana thawhpui zel atan a sáwm.

MJA president Zonunsanga Khiangte pawhin thu sawiin, MLA thilpek chu MJA tan thil ropui tak a nih thu a sawi a, "Hetiang hi kan tawng tam lo a, kan tawng leh zeuh ṭhin. Rotling hlu tak kan nei ta hi MJA chanchinah a chuang reng tawh ang. MJA hmangaihtu kan tawng fuh hi kan lawm hle a ni," a ti.