MJA-in General Conference an hmang

Mizoram Journalist Association (MJA) chuan nimin khan Berawtlanga Art & Culture Auditorium-ah General Conference vawi 43-na an hmang a; minister Lal Thanzara khuallian niin, minister of state C Ngunlianchunga khualzahawm a ni.

Khuallian Lal Thanzara chuan, sorkarin chanchinbumite a ngai pawimawh tih sawiin, "Kan sorkarin a theihna apiangah chanchinbumite a duhsak ṭhin," a ti a; media mite chu sorkarah neitu thinlung pu tur leh inthlahrung lo turin a chah.

Mizote'n a chhe zawngin thil an thlir nasa lutuk nia a lan thu sawiin, Thanzara chuan, "Thil ṭha lo a thlen chánga Mizote a chhe thei ang bera insawi hi chu a dik lo. Ram leh state upa zawkte nen inkhaikhin chuan kan la ṭha lo pawh a ni ang, mahse, Mizote hi kan duai lo. Kan ṭhatna leh felna lamte thlir ve fo a ṭul a, chanchinbute pawh hian a ṭha lam hi ziak tam se, mipuiteah a ṭha zawngin hna a thawk ngei ang," a ti.

Sorkarin kawng ṭha vek duh mah se, a ṭha lai leh ṭha lo laite a awm thu sawiin, Lal Thanzara chuan, "Kawng leh power-ah Mizoram hi hmarchhak bialah kan ṭha ber," a ti a; Mizoram kawngte chu a tlangpuiin India ram state dang kawngpuite aia a ṭhat zawk thu a sawi.

Lal Thanzara chuan, SMS-a thu thawn puan chhuah ṭhinin cable TV leh chanchinbute a tichhangchhiaa a hriat thu sawiin, "Siam-
ṭhat duhna vang a ni lo fo a, indiriamna rawngkai a ni fo. Heng puanzar leh chhuah hian thil a siamṭha em tih ngaihtuah a ngaiin ka hria," a ti. Journalism-in a tum chu mi dangte rawngbawlsak a ni tih sawiin, "Thil ti thei tak a ni a, thunun loh chuan tichhetu a ni thei. Chanchinbumite mahni inthunun a ngai," a ti.

Minister-te khuallian ṭang tam lutuk tia mi ṭhenkhatin an sawisel ṭhin chungchangah Lal Thanzara chuan, khualliana ṭan chu thil dik lo a ni lo tih a sawi a, "Mipui hruaitu chu mipui zingah an awm tam tur a ni a, khualliana an ṭan hi an hna a ni zawk. File work nileng zankhuaa thawh tur a awm lo a, khuallian nih hi office hnain a tawrhna tur a awm lo," a ti.

Minister Thanzara hian chanchinbumite chu thu rintlak chauh chhuah tur te, ṭawng humhalhtu leh zirtirtu nih tum tur te, a ṭha zawnga mi kaihruaitu leh a chhe zawnga mi hruai sual theitu an ni tih inhre reng turin a chah a ni.

Khualzahawm C Ngunlianchunga chuan, MJA member-te chu hma lam pana inzir zel tur te, hmasawn tum zel tur te, investigative journalism uar tur te, thu thar rintlak chiah chhuah tum turtein a chah a, "Social media chak hle mah se, chanchinbu leh TV news-te hlutna a nêp chuang lo a, mipuiin rintlak bera an ngaih a la ni reng," a ti. Chanchinbute chu advertisement chauha innghat lo turin a chah bawk.

MJA president Vanlalrema Vantawl pawhin thu sawiin, MJA member-te chu siam-
ṭhat ngaite siamṭhat tum tlang tur leh hlawhtlinnaa inlawmpui tlang turin a chah a, "Pawl leh mi dangte tana malsawmna nih tum ṭheuh ila, MJA innghahna 'Service to the people' a taka thlentirtu nih i tum zel ang u," a ti.

MJA General Secretary report-a a lan danin, MJA member hi Mizoram pumah mi 204 an ni a, an zinga pathum chu prominent journalist an ni. MJA member hi Aizawlah 94, Mamit district-ah 14, Champhai district-ah 15, Kolasib district-ah 16, Lawngtlai district-ah 9, Lunglei district-ah 29, Saiha district-ah 12 leh Serchhip district-ah 15 an awm. Finance report-a a lan danin, opening balance nen kum 2015-16 chhungin Rs. 18,88,218 an hmu a, Rs. 15,38,053 an hmang a ni.

MJA conference-ah hian chawhnu lamah kum 2016-18 chhunga hruaitu tur thlanna leh rorel inkhawm neih a ni a; president-ah Vanlalrema Vantawl thlan a ni.

2016-18 MJA hruaitute

President : Vanlalrema Vantawl

Vice President : Zonunsanga Khiangte

Treasurer : R Lalhmangaihzuala

Executive Committee-te

1. BK Renthlei, LPS Vision

2. Lalremsiama, Zawlkhawpui

3. Lal Rinmawia, Vanglaini

4. T Lalbiakdika, Zawlbuk

5. Joseph Lalnuntluanga, Zonet

6. Lalnunzira, DDk

7. Lalrinmawia Sailo, Thlirtu

8. C Lalduhawma, LPS Vision

9. Zohmingmawia, The Aizawl Post

10. C Lalzamlova, Chhawrpial

11. C Lalhmachhuana, Youth Herald