2015-16 ah mit naute zai mi 2,080 an awm

National Programme for Control of Blindness (NCCB) chuan nimin khan Aizawl Civil Hospital conference hall-ah National Health Mission mission director Dr K Lalbiakzuala hoin Annual Review Meeting an nei a; kum 2015-16 inkarah mit naute zai (cataract surgery) 2,080 an awm thu an tarlang.

Dr K Lalbiakzuala chuan, Mizorama NCCB kan kalpui dan chu lungawi thlaka a hriat thu te, state tam tak zingah Mizoram chu NCCB kalpui ṭha berte zinga mi a nih thu te, Mizoramah a thlawna mit inentir leh damlote tana a thlawna damdawi dawn theina tur buaipui chhoh mek a nih thu a sawi.

Meeting-ah hian, Mizoramah cataract surgery kum 2014-2015 inkarah 2,011 an awm thu leh kum 2015-2016 inkarah 2,080 an awm thu tarlan a ni a; kum 2015-16 chhungin sikul naupang mi 30,111 mit a thlawna endik a nih thu leh chung zingah chuan mit ṭha lo enkawl ngai 3,749 hmuhchhuah a nih thu te, naupang harsa zual 1,638 hnenah a thlawna tarmit pek a nih thu an tarlang bawk.