Mizoramah lei tha tawk lo 28 awm; mithiamte endiktir dawn

PWD changtu chief minister Lal Thanhawla chuan, tun dinhmunah Mizoramah lei ṭha tawk lo 28 a awm thu a sawi a, "Lei zawng zawngte mithiamte endiktir tum a ni," a ti.

MNF member Dr K Beichhua zawhna chhangin Chief Minister chuan, lei dawh a nih laia a dâwl zawh tur rih zawng ang dâwl zo tawh lo 28 a awm thu a sawi a, "Lei ṭha tawk lo hi Mamit division-ah paruk, Serchhip division-ah pathum, Tlabung division-ah pathum, Champhai division-ah pakhat, Khawzawl division-ah pahnih, National Highway division-ah pali, Kolasib division-ah panga leh National Highway division II-ah pahnih an awm," a ti a; NH division-II hnuaia lei pahnihte hi chu lirthei zawhtir a nih tawh loh thu a sawi.

Lal Thanhawla chuan, Mizorama leite chu kar tin endik a ni ṭhin tih sawiin, "Lei endikna khawl kan nei ṭha lo a, expert pawh kan nei lo. A bialtute'n an endik a, a dinhmun nia an hriat kan ring a ni mai. Mithiam bik rawih a, leite hi endiktir vek tum a ni. Lei tawn tirhah lirtheiin a phurh theih chin tàr vek tum a ni a, a ṭulna apianga lei vengtu tur dah turin hriattirna chhuah a ni tawh," a ti.

MNF member Lalrinawma zawhna chhangin, Chief Minister chuan, Bairabi-Zamuang kawnga Tlawng lei dawh mek chu physical achievement 88% leh financial achievement 68% vel a nih thu House a hrilh.

CM Hawla sawi danin, Tlawng lei dawhna atan hian a tira sum sanction chu cheng nuai 612.50 a ni a, design tihdanglam a nih avangin cheng nuai 1221.05 turin NEC-ah thehluh a ni. NEC-in sum dil zat a pe chhuak thei lo a, tunah hian cheng nuai 486.16 mamawh niin, sanction thuai a nih an beisei. Lei dawh hna chu December 2010-a zawh tur ni mah se, harsatna hrang hrang avangin an zo thei lo a, rokhawlhna a awm loh chuan May 2016-ah zawh tum a ni.

Lal Thanhawla chuan MNF member Lalruatkima zawhna chhangin, Tuipui-D lei dawh chim chu dawh ṭhat leh mek a ni tih a sawi a, "NLCPR aṭang leh a tîr lama state
aṭanga sanction belh sum aṭang thoin thawh a ni a, a bak cheng nuai 34.02 ruahman belh a ni. Lei dawh ṭhat leh hian a design thlak hret a ni a, a tira design tu tho Guha Niyogi & Associates, Kolkata an ni," a ti.

Chief Minister chuan, lei chim chhan chiah finfiah ni lo mah se, a khaina tur thîr tlangpui (main suspender cable) anchor block-a thlunna hmáwr a pût vang nia ngaih a ni tih sawiin, "Lei chim hlimah contractor-in FIR an thehlut a, vawiin thlengin a result PWD lam chuan an hre lo," a ti a; lei dawhna estimate cheng nuai 266.21 aṭangin contractor hnenah cheng nuai 243.59 pek a nih tawh thu a sawi bawk.