CVJAC leh sorkar an inrem thei lo

Transport department hotute leh Commercial Vehicle Joint Action Committee (CVJAC) hruaitute chu nimin khan Transport Secretary pisaah an inbia a, an inbiakna a hlawhchham.

Inbiaknaah hian CVJAC aṭangin president Malsawmtluanga leh office bearer dangte an kal a, Transport aṭangin secretary Dr Franklin Laltinkhuma leh officer dang pahnih an tel.

Thu dawn danin, inbiaknaah hian Trans-port department hotute chuan lifetime tax chung-chang bak sawi an remti lo a; CVJAC lamin harsatna an neihte chu lifetime tax ringawt a nih loh thu leh, harsatnate sutkian nan STA emergency meeting koh an rawtna sorkar lam aiawhte'n an hnialthlak avangin inbiakna a awm mumal thei ta lo a ni.

Lifetime tax chung-chang bikah erawh chuan, sorkar rawtna, kum 5 dana pek theih tura ruahmanna siam tura an intih chu a thuphungin
ṭha an ti tlang a; mahse, tuna tax pek ngai tawhte'n dan tihdanglam a nih hma chuan lifetime tax an pek a ngaih tur thu leh fine/penalty-te chawi a ngai tho erawh chu CVJAC lamin ṭha lo an ti thung.

Life time tax kum nga dana pek theih tura rawtna chu engtika tihpuitlin tur nge tih sorkar lam aiawhte'n an sawi theih loh bakah, dan thar hman a nih hmaa inngaihhnathiamna a awm dawn loh avangin CVJAC chuan sorkar lam chu an ring tawk lo tih an sawi a, "Intihkhawtlai tumna mai niah ngaiin inbiakna tawpsan a ni," an ti.