KHAWTHLIR

MGNREGA sum

Rural Development minister R Lalzirliana chuan MNF member Lalruatkima zawhna chhangin, kum 2011-2016 chhungin MGNREGA atan cheng nuai 1,16,177.20 hmuh a nih thu House a hrilh a; hemi hun chhung vek hian state matching share cheng nuai nuai 8610.9 pek a nih thu a sawi.

Rules pharh

Nimina Assembly session-ah Finance minister Lalsawta chuan 'The Mizoram State Public Sector Enterprises’ Early Retirement Rules, (ERR) 2015' a pharh. He dan hi PSU-a thawkte ERR hmanga an chawlh theihna tur a ni.

Women Branch

Mizoram Cooperative Apex Bank Ltd. chuan, nimin khan Zarkawta H Malsawma building-ah Women Branch thar an hawng. MCAB branch thar hi hmeichhiate hman tur bika ruahman a ni a, chief minister Lal Thanhawla nupui Lal Riliani'n a hawng a ni.

Career workshop

State Institute of Rural Development leh Rajiv Gandhi National Institute for Youth Development, Sriperumbudur te chuan nimin khan Kolasib-a Mahatma Gandhi Hall-ah Kolasib district-a high school 14-a zirlai thlan chhuah 100-te tan career counselling workshop an buatsaih a, Kolasib DC H Lalengmawia'n a hmanpui.

MZU free clinic

Mizoram University-a Community Development Cell leh Health Centre ṭangkawp chuan, nimin khan Tanhrilah a thlawna inentirna an buatsaih a, vice chancellor Prof. R Lalthantluanga'n a hmanpui. Free clinic-ah hian mi 300 vel an inentir a ni.

Dan zirho

MHIP, Lawngtlai sub-headquarters, Lai Women Association leh Lawng-tlai District Legal Service Authority-te chuan nimin khan Lawngtlai DC conference hall-ah Mizo inneih, inṭhen leh rokhawm chungchanga dante zirhona an buatsaih a; Lawngtlai khawpuia MHIP leh LWA branch hrang hrang aiawh mi 150 vel an tel.