Kulikawn Hospital-ah STI Clinic hawng

Kulikawn Hospital-a Sexually Transmitted Disease (STI) Clinic siam thar chu nimin khan Health secretary Lalrinliana Fanai-in a hawng.

Health Secretary chuan, mipat hmeichhiatna hman aṭanga inkâi chhâwn theih natna enkawl dam thuai chu sorkar laipuiin a ngaih pawimawh thu sawiin, state tinah STI Clinic hawn belh zel a nih thu a sawi a, "Kulikawn Hospital-a kan hawng thar hi khawpui chhung leh a chhehvela cheng mi tam takin an chhawr
ṭangkai dawn a ni," a ti.

STI Clinic hawnna kaihruaitu, MSACS project director Dr Lalmalsawmi Sailo chuan, STI natna nei tan HIV kai a awlsam lehzual avangin enkawl dam thuai a ngai tih a sawi a; nu naupai zawng zawng tan HIV rualin STI test ti turin sorkarin hma a la mek tih sawiin, hmeichhe natna lam enkawltu bik leh doctor dangte chu STI natna kaihnawih an hmuhchhuahte STI Clinic kawhhmuh thuai ṭhin turin a chah a ni.

Kulikawn Hospital-a STI Clinic thar hawn hi STI counsellor-in a ṭhutchilh dawn a; STI/RTI test theih a nih bakah, damdawi a thlawna pek a ni ang. Mizoramah Sexually Transmitted Infection/Reproductive Tract Infection clinic 10 a awm mek a ni.