Taxi permit hralh phal a ni lo
Transport department hotute chuan, mihring phur chi sumdawnna lirthei permit an pek chhuahte chu hralh phal a nih loh thu an sawi. Hetih lai hian, tun hnaiah chanchinbu ṭhenkhatah leh social media lamah taxi permit zuar hmuh tur an awm ṭhin nia thu dawn a ni.
Vanglaini palai zawhna chhángin Transport department hotute chuan, "Permit hi hralh a thiang lo. Hralh phal a ni lo tih hi condition-ah a awm. Kar hmasa Zirtawpniah pawh khan notice (hriattirna) kan siam leh a ni. Engti kawng zawng mahin permit hi hralh phal a ni lo a, kan hnenah lo kal mah se, kan tihsak dawn lo," an ti.
Transport department hotute chuan, mi ṭhenkhatin permit lei an tum thu leh hming thlâk a nih leh nih loh department-ah an zawh fo thu sawiin, "Mimal eizawnna tura sorkarin a pek a ni a, zawrh leh hralh chhàwn khap a ni," an ti a; State Transport Authority (STA)-in permit a peknaa condition siamah, 'Permit hi hralh leh zawrh khap a ni,' tih ziah lan a nih thu an sawi.
Tunlaia two wheeler taxi permit zawrh leh hralh chungchang pawh an hriat ve thu sawiin Transport department hotute chuan, "Mimal inkarah an lo ti a nih pawhin keini chuan kan tihsak dawn lo," an ti.
Mizoram sorkar chuan tunlai hian two wheeler taxi permit a pe chhuak mek a; Transport department official-te chuan, sorkar aṭangin two wheeler taxi pek tur list department-in an dawng tih sawiin, "List hmasa lo kal, kan print chhuah kha 1,344 a ni a, a hnuah a mala lo kal a awm leh zauh zauh," an ti a, permit pek zat tak erawh sawi a har thu an sawi. Two wheeler taxi hi Mizoramah chuan Aizawlah chiah a awm a, khaw dangah tlantir a ni lo.
Aizawl Two Wheeler Taxi Association (ATTA) hruaitute sawi danin, Aizawlah two wheeler taxi tlân (service) lai 496 a awm a, ATTA-ah member 680 an awm thung. Two wheeler taxi pakhat chu mi pahnih/pathumin an khalh ṭawmte a awm a ni.
Hetih lai hian, mimal lirthei (private vehicle)-te erawh chu a neitu hming thlâk phalna dan angin tih theih a nih thu an sawi a; February 26, 2021 thleng hming thlak phalna hun hawn a nih thu an sawi bawk.