NIT boys hostel-a thil thleng vangin FIR thehlut

Mizo Students Union (MSU) chuan an general secretary Lalremruata hmingin, NIT-Mizoram Boys Hostel I-a thil thleng chungchangah nimin khan Aizawl SP-ah FIR an thehlut.

MSU chuan, March 16, 2016 zana NIT-Mizoram Boys Hostel-a buaina tênau chhuak chungchangah 1st. year zirlai ṭhenkhat, Rohit Ku-mawat, Anurag Singh, Vikhyat Parashar, Rajneesh Singh, Ankit Singh leh Shivam Patel ten hnam hrang inkara buaina nasa zawk thlen thei tur thil leh Mizo hnam mualpho theihna tur zawnga Facebook-a PMO page-ah thu dik lo an post niin an tarlang.

Mi parukte'n thu dik lo an post hian Mizo hnam leh NIT-Mizoram a tihmualpho avangin, thu thehdarhtute chu man chhuak a, a ṭul anga dan anga hma laksak turin an ngen a ni.

MSU chuan, nimin khan NIT-Mizoram director Prof. UC Ray chu a pisaah an kawm thu leh, buaina thlentu zirlaite hrem tura an ngen thu an tarlang.