Saihapui-V - Phainuam kawng siamna tur sum tichingpentute hrem an phût

ZPM Ṭhalai chuan thuchhuah siamin, Saihapui-V leh Phainuam inkar kawng metre 750 siam turah metre 402 chiah siam a nih chungchangah, mipui sum dik lo taka hman a awm nia an ngaih thu an tarlang a; dik lo taka sum tichingpentute zawng chhuaka hrem ngei turin sorkar an phût.

Saihapui-V leh Phainuam inkar kawng metre 750 siamna atan cheng nuai 16 pêk chhuah a nih laiin metre 402 chiah siam a ni tih sawiin ZPM Ṭhalai chuan, "Kawng siam chin tura ruahman metre 750 a tlin lohna chu metre 348 lai a ni a, kawng metre 348 siamna tur sum hi khawiah nge a luan ral tih hi mipuite'n hriat kan phú a ni," an ti.

ZPM ṭhalaite chuan, Saihapui-V leh Phainuam inkar kawng siamnaah mipui sum hman dik lohna leh eirûkna a awm ngei nia an ngaih thu sawiin, "Mipui sum hmanna hriat hi mipui chanvo a ni tih hre rengin sorkar hian sum dik lo taka hmangtute hi zawng chhuakin, an phû tâwk hremna pe ngei rawh se," an ti a; kawng la siam zawh loh metre 348-a thui pawh siam chhunzawm ngei an phût thu an sawi bawk. 

Saihapui-V leh Phainuam inkar kawng siamna atan hian MGNREGS sum Rs. 9,00,000, Rural Development department aṭangin Rs. 5,00,000 leh bialtu MLA fund aṭangin Rs. 2,00,000 pek chhuah a ni a, a vaiin Rs. 16,00,000 a ni.

MGNREGS sum Rs. 9,00,000 hmangin kawng metre 400 siam tur a nih laiin, metre 241 siam a ni a, siam chin tur metre 159-in a tling lo. RD department sum pek hmangin metre 250-a thui siam tur a nih laiin, metre 129 siam a ni a, siam chin tur metre 121-in a tling lo. MLA fund Rs. 2,00,000 hmangin metre 100-a thui, metre 3-a zaua siam tur a nih laiin, metre 32-a thui siam a ni a, metre 68-in a tlin loh bakah, a zau zawng pawh metre 3 a tling lo bawk.