Mizoramah World TB Day hman a ni

March 24 kha World TB Day a ni a, Mizoramah pawh Aizawl leh district headquarters ṭhenkhatah hman a ni. Aizawlah chuan IPR Auditorium-ah Health department hnuaia RNTBC huaihawtin hman a ni a, Health minister Lal Thanzara’n a hmanpui.

Minister Lal Thanzara chuan, ‘TB titawp turin i ṭangrual ang u’ tih thupui hmanga World TB Day hman chuan rah ṭha a chhuah ngei a beisei thu sawiin, "Khawvel mihring hmun thuma ṭhena hmun khat vel TB hrik pai anga chhût a ni a, India ram hi khawvela TB vei tamna ber a ni a, mi maktaduai thum velin TB hrik pai anga chhût a ni," a ti a; TB tihdam harsa bik Multi Drug Resistant TB (MDR-TB) pawh India chu a vei tamna ber a nih thu a sawi.

Health Minister sawi danin, Mizoramah kum 2015 chhungin TB vei rinhlelh mi 9,658 endik zinga 2,088-in TB an vei tih hmuhchhuah a ni a; TB vangin mi 38 an thih laiin, TB hrik hmuh chhuah zinga 84% chu enkawl dam an ni thung.

Lal Thanzara chuan, MDR-TB hmuhchhuahna khawl, CB-NAAT chu Aizawlah a awm tawh a, Lunglei leh Champhai district-ah hman mai theih turin bun fel a nih tawh thu a sawi a, "Vawiin thlenga mi 1,192 endik tawh zingah mi 178 chuan MDR-TB an vei tih hmuhchhuah a ni," a ti. HIV veite'n TB an vei awl bik avangin MSACS nen ṭha taka thawhho a nih thu a sawi a; private hospital leh private doctor-te chu TB an hmuh chhuah leh enkawlte sorkara hriattir zel turin a chah bawk.

Inkhawmah hian Health secretary Lalrinliana Fanai pawhin thu a sawi a; state TB officer Dr Vanlalfela'n TB venna leh enkawlna kawnga hmalak dante a sawifiah. TB hmuh chhuah leh enkawlna kawnga thawk ṭha damdawi-in leh mimal hnen-ah Health Services director Dr Rohmingthanga Ralte-in chawi-mawina thuchei a hlan a ni.

World TB Day hi Mamitah chuan Mamit District Hospital-a Eye department building-ah hman a ni a, Mamit DC Lal-biaksangi'n a hmanpui.

Mamit district report-a a lan danin, kum 2003 aṭanga 2015 thleng khan Mamit district-ah TB vei hmuh chhuah zat chu mi 802 an ni a; chuap TB mi 552, chuap páwn lam mi 180, TB vei nawn mi 70, TB vanga thi mi 13 an awm. Kum 2016 chhungin TB vei mi 22 a ni.