Mumbai Mizoram House damlote tan a ni: CM Hawla

GAD changtu chief minister Lal Thanhawla chuan MNF member Vanlalzawma zawhna chhangin, Mizoram sorkarin Mumbai-a in luaha Mizoram House a siam chu damlo leh a hruaitute awmna tur a nih thu a sawi a, "Sorkar hnathawkte tan thlen ve a rem lo," a ti.

Chief Minister sawi danin, Mumbai-a Mizoram House hi damlote tan chauha tih a nih avangin, sorkarin motor a dah pawh sorkar hnathawkte tan hman ve a rem lo. Tunah hian Mumbai Mizoram House tur sak mek a ni a, Shillong-ah pawh House awm tawh mah se, damlo an tam avangin House dang sak tum a ni.

CM Hawla chuan, Manipur khawpui Imphal-ah pawh sorkarin ram a nei tih sawiin, "Mamawhna a san lutuk loh bakah, sum a awm loh avangin house sak a la ni lo," a ti a; Zo hnah-thlakte insuihkhawm theihna kawng a nih dawn avangin Churachandpur-ah house sak tum a nih thu a sawi.

Lal Thanhawla chuan, state hrang hranga Mizoram House-te chu chei ṭhat tum mek a ni tih sawiin, "House-a thlen chungchangah MLA leh sorkar hnathawkte zingah inti lal deuh an awm ṭhin. Heng mite hi house enkawltute'n an ning hle a ni," a ti.