YMA rorel inkhawm Aizawlah nghat dawn

YMA Central Executive Committee (CEC) member-te March 24, 2016-a Central YMA Committee Room-a ṭhukhawm chuan, YMA rorel inkhawm chu Aizawla nghah turin an rêl a, palai kal thei tur zat an bithliah nghal.

YMA CEC meeting hi CYMA president Lalbiakzuala'n a kaihruai a, member 43 an kal. YMA general conference chu kum kar dana neih tur a nih tawh avangin general conference neih loh kumah rorel inkhawm neih tur a ni a, rorel inkhawm neih dan tur an rel a ni.

YMA CEC chuan, rorel inkhawm chu kumin October thlaah Aizawlah neih a, ni khat leh zan khat hun hman turin an rel a; palai turin CYMA office bearer leh CEC member te, CYMA office bearer hlui te, sub-headquarters aiawh mi paruk, group aiawh mi pali leh branch aiawh mi pahnih zel palai turin an bithliah a ni.

Central YMA meeting hian Chapchar Kut hman zawh tâk an thlir let a, a tlangpuiin programme a hlawhtling an tih rualin, hmasawnna tur tam tak awmin an hria a, "Ṭan lak leh zual ni se," an ti.

Sakawrhmuituai group YMA chu group pahnihah ṭhen a, Sakawrhmuituai group leh Tuirial Hydel group-a ṭhen an remtih a; Champhai khawpuia Salem branch chu Jail Veng branch tia a hming thlak an remti bawk.

PAMRA-in Peace Accord, 1986 chung--changa harsatna an thlente a ṭul anga thuneitute hnenah bawhzuipui an rel a; Tuisual group, Tuivai group leh Chalfilh group-te'n HPC(D) leh Mizoram sorkar an inbiak leh theihna tura Central YMA an ngenna chu Mizoram sorkarah thlen ni se an ti.