Sorkar leh JICA-in thuthlung an ziak

March 24, 2016 khan Chief Secretary conference hall-ah chief secretary Lalmalsawma kaihhruaiin Mizoram sorkar leh Japanese International Cooperation Agency (JICA) ten ‘Capacity enhancement for sustainable agriculture and irrigation development’ project atan thawhhona thuthlung an ziak.

Thawhhona thuthlungah hian Mizoram sorkar aiawhin Minor Irrigation secretary-in hming a ziak a; JICA-in project-a a thawhpui tur department dang - Agriculture, Horticulture leh Soil & Water Conservation hotute'n hming an ziak bawk. JICA aiawhin hotute an tel a, JICA team leader Satoru Fujita chuan project kalphung tlangpui a sawifiah.

Capacity enhancement for sustainable agri-culture and irrigation development project hnuaia hmalakna hmasa ber atan RD Block pali - Bilkhawthlir, Aibawk, Serchhip leh Champhai block chhunga khaw pakhat ṭheuh thlan a ni dawn a; a thawh hnihnaah block palite aṭangin khaw 3/4 ṭheuh thlan leh a ni ang.

Thawhhona enkawl tur hian Mizoram Chief Secretary kaihhruaina hnuaiah Joint Coordinating Committee (JCC) din a ni a, Committee-ah hian Mizoram sorkara secreatary-te bakah, Ministry of Water Resources aiawh an tel ang.

JICA hian anmahni sensoin September 2013 aṭanga April 2015 chhung khan Development Study an lo nei tawh a, Mizoramin ei leh bara hma a sawn theih nan kum 20 chhunga tihhlawhtlin tur Master Plan an duang. Master Plan ṭha taka kalpui a nih theih nan Technical Cooperation Project (TCP) hmangin Japan mi thiamte'n kum nga chhung Mizoram sorkar an thawhpui dawn a ni.